Vawiin March ni 9, 2023 Ningani khan ZPM Southern Hqrs.Office, Venglai Lunglei-ah Lunglei Municipal Council inthlanna lo awm tura ZPM Party aiawha Candidate turte puan chhuahna hun leh Party-a lawmluhna hun hman a ni a. He hun hi V.Malsawmtluanga Vice President, ZPM Southern Hqrs.Lunglei chuan kaihruaiin, Rev. V. Vanlalchhunga chuan hunserh a hmang.
K.Sapdanga Working President, ZPM General Hqrs.Aizawl chuan Candidate te Party-a lawmluhna leh rinawmna thutiam tiám tirna hun a hmang a. Lalrinpuii President, ZPM Southern Hqrs.Lunglei chuan candidate turte tawlhloh puan a bah tir hnuin, K.Sapdanga chuan ZPM Party Candidate atan lâwm takin he’ng mite hi a puang chhuak a ni.
- 1. Ward No 1 : Zotlang & Pukpui Lalhruaitluangi Sailo D/o Sailova Sailo – Pukpui
- 2. Ward No 2 : Serkawn & Zohnuai Lalrempuii Renthlei D/o Dr.R.Lalramzauva – Serkawn
- 3. Ward No 3 : Bazar & College Veng Lalzuithanga S/o Lalringaia (L) – Bazar Veng
- 4. Ward No 4 : Venglai & Venghlun R.Lalramzauva S/o R.Kawlṭhuama – Venglai
- 5. Ward No 5 : Rahsiveng, Sazaikawn & Hauruang – Zonunmawii D/o C.Hrangdingliana – Rahsi Veng
- 6. Ward No 6 : Electric Veng Lalremsiama S/o Zothanmawia – Electric Veng
- 7. Ward No 7 : Chanmari K.Lalrinawma S/o KT.Chhawna – Chanmari
- 8. Ward No 8 : Ramthar & Farm Veng K.Lalmalsawmi D/o K.Zatawna – Ramthar
- 9. Ward No 9 : Lunglawn & Salem Zorinsanga Hmar S/o H.Lalzarliana – Lunglawn
- 10. Ward No 10 : Sethlun, Theiriat Luangmual, Hrangchalkawn Judy Lalhriatpuii D/o S.Zachhawna – Luangmual
- 11. Ward No 11 : Zobawk ‘S’, Zobawk ‘N’ & Lungpuizawl Vanlalliana Pachuau S/o Beiseia Pachuau – Zobawk
K.Sapdanga chuan thû sawiin, “sum leh pái leh therhlo engmah tawktar tur kan nei ve lo chung pawha, ṭhalai lehkhathiam leh hmalam hun eng tak tak nei Lunglei khawpui hmangaihna rilru púa ZPM Party Candidate atana in lo pen chhuak hi a lâwmawm hle a. Nangni ho hian ZPM Party thil tum hrang hrangte hi in rawn tihlawhtling ngei ang tih pawh kan ring tlata, chumi tur pawh chuan in lakah hian Lunglei mipuite pawh hian beiseina sang tak an nei a ni” a ti.
K.Sapdanga chuan a sawizélnaah, “kan ram leh hnam min eichhe tu ber chu eirukna hi a ni a, a té ber aṭanga a lian ber thlengin eirukna hi kan do tlat tur a ni. Mi ṭha tak tak nia kan ngaih, kan ram rorêlna inpuia ṭhu tura kan thlan tlinte pawh eirukna leh hlemhlêtna avangin mi chhe berah an chhuak mek zela a pawi em em a ni. Vawiina LMC Candidate atana ZPM Party-in kan puan chhuahte hi chu, eirukna leh hlemhlêtna lakah pawh fihlîm tlat turin kan beisei cheu a ni” a ti a.
“ZPM chuan moral reform hi kan tum ber pakhat a ni a. Kan ram leh hnam min eichhe em emtu pakhat chu a thlâwna sum dawn ‘Sem policy’ hi a ni. Vote zawn nan a ni emaw ni lo emaw, a thlâwna sum dawn hrim hrim hian kan mimal nun mai piahlamah, kan khawtlang nun thleng hian a eichhe hneh hle a. Vote zawn nana pawisa semte phei hi chu rilru tihchhiatna zawnga pawi ber a ni a, ZPM party chu heti ang kawngah hian kan fihlîm tlat tur a ni. Mipuite pawhin min hriatpui ula kan duh chu, vote zawnna ang chi reng rengah a thlâwna pawisa sem hi ZPM Party chuan kan ti ve ngai dawn lo a ni” tiin, a sawi bawk.
