District Programme Officer, Conference Hall Zotlang, Lungleiah vawiin khan CSR kaltlangin Anganwadi bungraw semchhuahna hun hman a ni a, Lunglei Bawrhsap Pu Kulothungan A, IAS, chuan he hun hi a hmanpui.
Anganwadi bungraw semchhuahna inkhawm Pi Lalthlamuani, CDPO Lunglei kaihhruaiah Pu Kulothungan A chuan CSR kaltlanga Central Warehousing Corporation, Guwahati ten Lunglei khawpui chhung Anganwadi Centre te tana bungrua an ngaihtuah sak chu lawmawm a tih thu sawiin, Anganwadi Centre ten hma an sawn theihna tur leh harsatna an tawhte sutkianpui thin tu CDPO leh thawktute dangte chungah lawmthu a sawi bawk a ni. Bawrhsap chuan Naupang Sikul la kal ruallo te chu an ngaihtuahna leh taksa hrisel tak an neih theih nana uluk taka enkawl a pawimawh hle a ni tiin, hemi kawngah hian Anganwadi Worker ten mawhphurhna sang tak an nei tih hriaa taima tak leh dawhthei taka naupangte an enkawl a pawimawh a, naupang te te ten zirna pangngai Sikul kal chhunzawm chakna thinlung an put theih nan uluk taka an nun kaihhruaia zirtir an ngai a ni tiin Anganwadi Centre te chu tihhmasawn chhoh zel tum a ni a ti bawk. Tun dinhmunah Lunglei District ah Model Anganwadi Centre 5 a awm mek tih sawiin, sorkar kumtharah Lunglei District chhung hmun hrang hrangah Anganwadi Centre 25 hawn belh tum a nih thu a sawi bawk.
