Vawiin chawhnu khan Lunglei Bawrhsap Pu Kulothungan A, IAS kaihhruaiin a office chamber-ah naktuk 1st, March 2022 atanga Lunglei District chhunga naupang kum nga(5) hnuailam te tan Zenghri danna Intensified Pulse Polio Immunisation (IPPI) leh ni 7th, March, 2022 atanga naupang kum hnih (2) hnuailam leh nu naupai te tan Intensified Mission Indradhanush (IMI) 4.0 2nd round pekdan tur ngaihtuahin meeting neih a ni.
Dr. Lalrinthangi, District Immunization Officer, Lunglei chuan India pumah IPPI hi February ni 27th khan pek a ni a, Mizoram erawh Sunday anih avangin 1st March, 2022 atanga pek tan an tum thu sawiin a hawnna Lunglei Bawrhsap Pu Kulothungan A hovin Chanmari Health Sub Centre ah neih tur a tih a ni.
Lunglei District chhunga SDH/CHC/PHC/MC ah zenghri danna pek tur hi naupang 14655 niin booths 233 atanga pek chhuah a ni ang. Centre hrang hrang a hri danna la lo te pawh in tina kal in hri danna pek an ni ang a,hemi bakah hian zin veivak te tan transit point pathum (3) siam niin MST, Venglai, Sumo Stand, Venglai leh Sumo Stand, chanmari ah te hridanna pek a ni ang. Covid positive vei te chu an vei atanga ni 21 ah hridanna pek tur a tih a ni. Zenghri danna hi Myanmar atanga raltlan refugee camp pali (4) awmna Cherhlun PHC, Hnahthial CHC, Thingsai PHC leh Tawipui PHC ah te pek tum a ni bawk.
