Aizawl April 13 :
Vawiin khan Siaha Tourist Lodge Conference Hall-ah MADC General Election lo awm tur atana ZPM Party Official Candidate puanna hun hman a ni a. He hun hi Pu TBC Lalvenchhunga, Chairman, ZPM MADC Election Committee-in a kaihruai a, Pu K Sapdanga, Working President-in Candidate puanna leh thusawina hun a hmang a ni.
Heng mite hi MADC General Election vawi 12-na lo awm tur atana ZPM Party Official Candidate te chu an ni –
1. 1-Tokalo – Alfred K Daolai S/o K Zamo
2. 4-Laki – Pasa T Azyu S/o A Hutha
3. 13-Saikao – HC Ezara S/o HC Manliana (L)
4. 16-No-aohtlah – Tumhranga S/o Thawngluaia (L)
5. 18-Siaha North-I – BS Lualai S/o B Seikhai (L)
6. 20- Siaha South-I – NT Lalringliana S/o NT Vakaw
7. 23-Siaha East-II – V Zuala S/o V Vasai
8. 24-Siaha West-I – David NT Beizi S/o NT Malua (L)
Pu Sapa chuan, “MADC General Election hi ZPM chuan kan chuh ve vawikhatna tur a ni a. ZPM tel loin MADC inthlan hi vawi 11 zet a lo awm tawh a. Tun tum a vawi 12-naah kan han telve ta a. A vawikhatnaah heti zat seat luah theia kan awm hi a ropui kan ti a, hmasawnna kan hmuhah hian kan lawm em em a ni. ZPM chuan sum emaw, kut tling lo therhlo dang kan hmachhuan dawn lo a, MPF duhdan leh ram dan kan ngai pawimawh dawn a ni,” a ti.
TBC Lalvenchhunga, ZPM MADC Election Committee Chairman, chuan, “Candidate tur tha tak tak kan nei hi kan lawm hle a. Candidate tur hrim hrim hi chu kan hmu ve nual a, amaherawhchu, MADC politics tih chiri hi kan tum a ni lo a, ram hmasawnnna siam thei tur ngaihtuahna uluk takin kan seng a, zirchianna nen mumal takin hma kan la a, heng bialah te hian kan chak thei ang, hmahruaitu tur kan mamawh a ni tiin candidate kan siam ta a ni. Vawiina kan hun tawn hi MADC mipuite tana rahbi thar a nih ngei ka beisei,”a ti bawk.
