MADC inthlanpui inbuatsaihna kal mêkah, ZPM Thalai President Pu Malsawmzuala Ralte, AMC Councillor ni bawk chuan, Thosai khua-a ZPM campaign office chu ni 28.4.2022 chawhnu khan hawngin, Pu Malsawmzuala Ralte chuan, ‘Thawhrimna hmanga hmasawnna hi a tlo ber a, kan ngaihluber tur a ni; a thlawna sem emaw thawh hahna tel lo emaw hian hma min sawn tir ngai lo’, a ti a, Mara-ram mipuite chu tling zo lo tura an ngaih pawh an duh zawng tak chu vote mai turin a chah. ZPM Thalai President chuan, ZPM-a a tel chhan chu ZPM policy a ṭhat vang a nih thu sawiin, “Mipuite’n tun aia hma kan sawn theih beiseiin ZPM-ah ka tel ve a ni”, a ti.
Pu Malsawmzuala Ralte chuan, dik taka tih chuan politics-ah hausak viau na tur a awm loh thu sawiin, “Ram leh mipuite aia mahni hamṭhatna, mahni nawmsakna, ro sum leh paia inhai vur duh rorêltute hi, kan chunga rorêl zui zêl tur an ni bîk em ni?”, a ti a, chutiang mi chu mipuite’n kan vote hmanga kan paih a hun tawh thu sawiin, Mara-ram mipuite chu an biala ZPM candidate lo vote ṭheuh turin a ngen a ni.
