Aizawl, April 28 : May ni 5, 2022-a MADC inthlan lo awm turah ZPM hruaituten ngawrh takin campaign rusum an thlak mek a. ZPM Leader Pu Lalduhoma pawhin Tokolo, Bymari, Lomasu leh Laodaw lam a hrut mek a ni. Hmun hrang hranga a kalnaah public meeting neiin hun a hmang zel a, a kalna apiangah ZPM Leader hi mipuiin an lo lawm hle a ni.
MADC area khaw hrang hranga thusawitu ZPM Leader chuan, “ZPM-in kum 2023-ah sorkarna kan siam dawn a, ZPM hun a inherchhuak tawh dawn a ni. MADC hi MNF Sorkar hnuaia awm turah lo inngai suh u. Tin, India ramah congress an te zel a, Mizoramah pawh congress-in hun rei tak ro an rel hnuah, an te tual tual a, congress tan bial him a awm tawh lo. Kan congress unaute hi hun inher milin insiamrem se la, ZPM-ah an tan hmun a awm reng a ni,” a ti.
MNF chungchang sawiin, “MNF pawh an hotupa ber hi mipuiin Zoram sum enkawltuah an ring zo tawh lo a, christmas vawi 1 an hmang leh ang a, an hun a zo tawh dawn a ni. An hotupa thusawi hi Zoram mipuiin kan ring thei lova, amah ngei pawh hian a awih kan ring lo. MNF unaute pawh inherrema ZPM-ah an tan hmun a awm a, thawhpuiah kan sawm a ni. Kan ram hruaitute corruption-ah an fihlim loh avangin kan ram a dam thei lova, keini erawh chu kan corrupt ve dawn lo a ni,” a ti bawk.
Pu Duha chuan, “Tokalo bialah historical thil hlu tam tak a awm a, kan eibel tur Phura phai zawl zau tak a awm bawk a, heng hi ZPM a sawrkar hunah kan MDC te nen thawk hovin khualzin hip nan kan siam dawn a ni. Chuvang chuan, kan party candidate te hi min lo vote pui vek turin ka sawm che u a ni. Keini chuan kalphung thar kan rawn aupui a, mipui sorkar siam turin zoram kan tuam mek bawk a ni,” a ti.
