Vawiina BJP Mizoram chhung inkhawmah Vanlalhmuaka State President chuan mi 24 BJP ah lawm takin a lawmlut a, Thusawina hun a nei bawk.
Vanlalhmuaka chuan, “Pu Zoramthanga kaihhruai MNF Sorkar in Rs 300000/- kan sem dawn ti chung a, hlawhtlinpui tham loh Rs 25000/- chauh an sem hi athinrim thlak hle a, an mahni pawhin, an hlawhtlinpui theihloh tur mipui hlawhtlinpui tir an tum hi mipui zahlohna a ni, ” a ti.
Pu Vanlalhmuaka chuan, “Mizoram a 2023 MLA General Election ah hian kan Sorkar dawn tih chiang taka sawi thei awm chhun chu keini BJP te hi kan ni a. Party dangte erawh chuan kan Sorkar dawn tih hi an sawi lawk thei lo thung a ni. Kumin 2023 MLA General Election lo awm tur ah hian BJP hi kan Sorkar ngei dawn a, keimahni a kan Sorkar loh pawhin, BJP tellovin Sorkar a awm dawn lo a ni. Hei mai bakah BJP hi India ramah kum 30 atanga Kum 50 chuang kan la Sorkar ngei ngei dawn a, hei vang hian Mizoram ah pawh BJP hi kan Sorkar dawn a ni,” a ti.
“BJP chuan mirethei te tan Scheme tam tak kan nei a, Mizoram ah pawh Tui Connection free te, PM Housing For All te, Free Gas Connection te, Free Ration te, Tar Pension thlengin Mirethei te tan hamthatna tam tak a siam a, Nimahsela kan Sorkar hrawn mek te erawh chuan PM Scheme te chu an ngaihsak tha lovin, an tuipui lo hle in alang a, an buaipui ber erawh chu Restricted Tender, a hmu tur chiangsa hmanga Contract hna pek a ni. Chuvangin Mirethei ten kan chanvo leh kan chanai vawiin a kan hmuh loh hi, BJP kan Sorkar anih chuan kan hmu vek dawn a ni,” a ti bawk.
