Aizawl 11th March, 2024 : Vawiin thawhtanni khan ZPM chuan Party Office-ah chhung inkhawm hun hmangin thusawitu Pu Lalthazuala Rawite, Chairman, MIFCO chuan, “ MIFCO hian hun harsat tak a lo tawk tawh thin a, hun hmasa lamahte hlep nei lo leh thawktute mamawh pawh lalut zo lo thin mahse kalphung thar hnuaiah hmasawn kan tum a, mahni inenkawl zo leh hlep nei turin hma thar kan la dawn a ni,” a ti.
MIFCO Chairman Pu Lalthazuala Rawite chuan, “ MIFCO hian assets tha tak tak a nei a, tuna a hlutna chu Rs.27 crore zet niin Mizoram hmun hrang hrangah hmunhma a nei tha hle a. State Nodal Department chu Directorate of Trade & Commerce a ni. MIFCO (Mizoram Food & Allied Industries Corporation Limited) chairman atana min ruat hnuah ni 38 a liam tawh a, tum 4 chu kan hmunhma hrang hrangte tlawhin ka zinchhuak tawh a, hmalakna tur a tam hle. Kan Chief Minister-in min tuipuiin min phurpui takzet a, a bikin Sapthei sawngbawl dan turah Project siama hma la nghal turin min ti a, rang taka bawhzuiin tunah hian project pawh thehluh mai theih turin kan buatsaih zo tep tawh a ni. Mizoram sapthei hi a tui bik hle a, tuna kan buaipui chin ringawt pawh hian state pawna a duhtute kan pe daih lo hial tawh zawk a ni. Chuvangin sap thei ching uar a, hmalakna pawh nei tur leh man man zawka a chingtute tan pawh innghahna tlak a nih theih nan hma thar kan la dawn a ni. Tunah hian thawktu nghet mi 19 leh provisional employee mi 6 kan awm mek a, thawktu tlem mah ila kan tih theih sang ber tih kan tum tlat a ni,” a ti.
Pu Thazuala chuan, “MIFCO din chhan ber chu thlai leh thei bakah sa chi hrang hrang atanga thil siamchhuah (Food Processing) kawnga hmasawnna ngaihtuah tur leh hmalak a ni a, Heng ti thei tur hian thei leh thlai chingtute leh ran vulhtute leh a dangte hnen atanga lei a, sawngbawl leh hralh chhuah tura buatsaih a, kan ram intodelhna kawnga ke pen a ni. Pradhan Mantri Formalisation of Micro Food Processing Enterprise Scheme (PMFME) hnuaiah hlawhtlinna engemawzat nei tawhin sawrkar department hrang hrangah target neiin hand holding support a pe tawh a, sapthei leh lakhuihthei sawr hna kalpui reng niin kan hmalakna tur hrang hrangah ram mipuite min tawiawmna leh phurpuina kan mamawh takzet zet a ni” a ti bawk.
