Dated Aizawl, the 4th November, 2022 :Mizoram Pradesh Youth Congress Committee chuan thuchhuah siamin, “Tunhnaiah Lawngtlai leh a chhehvela Power & Electricity Department hnuaia hnathawhna hmunah mi 4 laiin nunna an chan hi Congress Thalai chuan pawi kan tiin nunna chan ta chhungte kan tuarpui takzet a ni.
“Nimin November ni 3, 2022-a Lawngtlai AOC Venga chhiatna thleng leh October ni 17, 2022-a Rulkual khuaa chhiatna thlen chhan te kha ngun taka kan zir chianin thawktute inthlahdah vang liau liau a ni tih chu Congress Thalai Hqrs. ngaihdan a ni a. Chuvangin, mahni mawhphurhna inpe ‘Moral responsibilty’ laa banna thehlut ngam turin P&E Minister chu Congress Thalai chuan kan chah a ni.
“Tin, he chhiatna thlen veleh bialtu MLA zahawm tak Pu C. Ngunlianchunga’n opposition MLA ni chunga theihtawp-a hma a la hi Congress Thalai chuan fakawm kan ti hle a. Chief Minister hnena a thu thlen Magisterial Inquiry dina a mawhphurtu chhui chhuaka an phu tawk hremna pe turte, mitthi chhungte hnenah zangnadawmna pawisa fai leh compassionate appointment pek an nih ngei hi Congress Thalai chuan Mizoram sawrkar hi kan phut tlat a ni.
“Mizoram sawrkar Pu Zoramthanga kaihhruaina hnuaiah hian mipuite kan rum mek a, kil tinah harsatna leh buaina chhum a zing ni berin Congress Thalai chuan kan hria a. Nitin khawsakna tui, electric leh Gas man a lo pung zel te. State sawrkar sum bawmin a sen a kawk reng mai leh sawrkarin leiba an ngah em em mai te hi a lu ber atanga a hnuai lam thlengin ‘Thluaka sum lut’ hri an vei vang niin Congress chuan kan ngai a ni,” an ti.
