Congress Thalai chuan, “May 13, 2025 a PR No.MPYCC/Mz-B/2025-2026/PR-047 a lo siam tawh angin kum 2023 MLA Election neih dawna ZPM MLA Candidate tur Vanapa Hall-a puan anih tuma ZPM Leader Pu Lalduhoma’n ZPM Party-in sorkarna kan siam chuan, ‘Ruihhlo ngaite enkawlna tur ‘Community Healing Centre’ UNO hriat tham, World Health Organisation nena tang tlanga din a nih tur thu,’ chiang takin a sawi a. Ruihhlo ngaite mahni kea ding thei tur leh an hnathawh tur thlenga an siam sak tur thu uar takin a sawi a ni. Mahse, hei hi mipui bumna a nihzia a lang mekah Congress thalai chuan a ngai a ni,” tiin thuchhuah a siam.
Thuchhuahah chuan, “December 8, 2024 chawhnu khan Pu Lalduhoma, Chief Minister chuan Sakawrtuichhuna Tawngtai Bethel Camping Centre (TBCC) a tlawh tumin Mizorama Home hrang hranga enkawl mekte tan buhfai leh mamawh pek tihpun a tul tih a sawi bawk.
“Hetianga Ruihhlo ngaite hmakhua ngai niawm taka hmalak dan tur nei anga insawi si khan Social Welfare Department hnuaia din Jordan Centre (Sethawn) a awm, Kolasib Doctor-in an vil leh Nurse-in an awm chilh, Social Welfare Department hnuaia Central Fund an dil atanga enkawl chu ZPM sorkarin mimal hnena hlan/hralh tumin hma a la a, mi tumahin an chhan loh avangin tih ngaihna hre lovin a ti tawp ta ngawt a. Tunah Chief Minister anih hlima hmalak sak a tum TBCC lah chu a ti kehchhe mek bawk. ZPM sorkar hi mahni nihna ni lo anga lan tum, mahni nawmsakna atana neihsa hralh tum a ni tih a langchiang a. Tin, Chief Minister chuan motor pakhat bak a mamawh dawn lo; Motor manto ah a chuang lovang titu te’n an thutiam hi kil tin kil tanga an zawm lohzia a lang zelah Congress thalai chuan a ngai a, mipui min bum nasa hleah a ngai a ni.
“Congress thalai chuan ZPM sorkar chu Ruihhlo ti hluartu, dan phal loh hmangin Party fund an tuak ta mai em ni tih turin an Minister leh MLA te pawh Ruihhlo tawlhtu leh zuartute nena phusa ho te, Minister pakhat zin pawh Assam rifle hovin an rinhlelh avanga vawi khat chauh ni lo an tih din ngam; Chief Minister, Home Minister leh Party pawhin a thlavang an hauh ngam miah loh khawpa ram mipuiin an rinhlelh sorkar a ni a. ZPM sorkar hnuah khawlaiah Ruihhlo (No. 4) hi kuhva lei ang maia lei tur a tam em em a. Nunâu leh hmeichhe tan zanah pâwn chhuah hlauhawm khawpin Aizawl khawpui hi a him lovin a thianghlim tawh lo a ni.
“Hetiang taka Ruihhlo a hluar laia sorkar hluiah CM in Adviser a neih nasa taka sawiseltu; CM in Adviser a neih tam ber Ministry-a zak miah loa CM Adviser ni leh duh si Pu TBC Lalvenchhunga’n TBCC chungchanga sorkar mualphona chu sorkar kal tawhte avang tia Facebook a post a siam chu zahthlak a tiin, Adviser anih angin UNO hriat tham, WHO nen tangduna Ruihhlo enkawlna siam thuai tura CM hnena thurawn pe zawk turin Congress thalai chuan a ngen a ni,” an ti bawk.
