Ni 15.03.2023 (Nilaini) hian Congress Party chuan Congress Bhawan Golden Hall-ah Wednesday Special Programme hmangin, Manifesto no. 2 a tel ‘Old Pension Scheme’ chungchang zirhona leh sawiho hun hman a ni. He hunah hian T. Sangkunga, Ex-MLA chu Speaker niin, Lalsawta, President MPCC in thu a sawi bawk.
T. Sângkunga chuan, Old Pension Scheme hi British hnuaia kan awm lai aṭanga sorkar hnathawkte tana vawiin thlenga hman a ni. Sorkar hnathawkte hian an pension benefit leh an GP Fund an la chhuak thei a. Chung an sum lakchhuah chu insak nan leh chhungkaw mamawh lei nan an hmang a. Tin, insakna bungraw zuartute, chawhmeh leh sa zuartute, thingpui dawr siamtute leh inhlawhfa te’n an chhawr a, Pathian ram pawh a pun phah ṭhin a ni, a ti.
Central sorkarin New Pension Scheme hi ni 1.1.2004 aṭangin a hmang ṭan a. Mizoram sorkarin New Pension Scheme hi ni 1.9.2010 aṭangin a hmang tan ve thung a. Tun thleng hian kan ṭhatpui lo zawk niin a lang. Sorkar hnathawk, an hnathawh leh nihna inang reng, Old Pension Scheme leh National Pension Scheme hmang an awm hi sorkar hnathawkte zinga inlungrual lohna siam theitu a ni bawk a. A tak taka hnathawktu sorkar hnathawkte rilru na tam tak a awm tir reng tûr hi Congress Party chuan tha a ti lo a, in ang tlânga awm hi ṭha kan ti a. Old Pension Scheme hman leh mai hi a ṭha kan ti a ni, a ti bawk.
T. Sangkunga chuan, tunah hian India ram State hrang hranga sorkar hnathawkte chuan Old Pension Scheme hman leh hi an nawr deuh vek a. Chuvangin kum reilote chhungin India ramah Old Pension Scheme hi an hman leh a rinawm a. Chutih karah keini State pachhe em em, kan kut ke ber sorkar hnathawkte zinga in an tlân lohna siam a, National Pension Scheme a sum kum tin chêng vbch 45 aia tam chawi belh hi atthlak hle zawk a ni, a ti bawk.
Lalsawta, President MPCC chuan kum 2010 September ni 1 hmaa sorkar hnathawk lâk tam takte kum 25 aia naupang tam tak an awm a. Hemi ni hmaa an Service ‘regularise’ hman lova, a hnua ‘service regularise’ an nih chuan New Pension Scheme hnuaia awm tûr an ni a. Chutiang mi chu Mizoramah mi 9000 vêl nia hriat a ni. Hêng mi 9000 velte hi chawhrualin kum 25 mi ni ta se, kum 2045 August thla-ah an pension dawn hlawm a ni.
Hemi rual chiah hian Old Pension Scheme hnuaia thawkho an zo (Zero) chiah ve thung ang. September 2045 aṭang hian Old Pension Scheme hnuaia mi Pension pek tûr a nei lo nghal chiah bawk ang. Pension chhuak thar pek tûr nei lo mah se mi 40000 vel bawr kha kum 25-30 chhung vel chu ‘monthly’ Pension/Family Pension a pek zui a la ngai tho tho ang.
Lalsawta chuan, chutih hunah chuan sorkar hnathawk nghet zawng zawngte New Pension Scheme an nih vek tawh dawn avangin tuna New Monthly Matching Contribution chêng vbch 4.5 vel hi cheng vbch 45 a tling daih thei dawn a. Kum khat chhung phei chuan cheng vbch 540 a tling thei dawn a ni. Chutiang a nih chuan Old Pension Scheme leh New Pension Scheme a sorkar sum sên tûr chu rei tak a la sâng chho hle reng dawn a nih chu! Chutichuan sorkarin New Pension Scheme a hman reng avanga sum kawng hniha a hman reng loh hun tûr chu Old Pension Scheme hnuaia Pensioner leh Family Pensioner an awm miah loh hun chauh a ni dawn a, kum 50 vel zet a la ni dawn a ni. Chuvangin sorkar tan hian Old Pension Scheme hi hmang leh vek se, a zangkhai thlak theih hmel zawk a ni, a ti a. Kum 2023 MLA General Election-ah Congress Party kan sorkar a nih chuan Old Pension Scheme hi kalpui leh kan tum a ni, a ti bawk.
He hun hi Lalremsanga, Secretary MPCC chuan Moderator niin a kaihhruai a ni.
