Congress Thalai chuan thuchhuah siamin, “Thla sawmpakua teh meuh mipui nunphung buai leh nunna tam tak chan an awm hnuah Manipur sorkar leh Central sorkarin thlei bik neia ro an rel hi Congress thalai chuan pawi a ti tak zet a. Khawvel ram dang mit hmuhah India ram zahawmna a ti bawrhbangah a ngai a ni.
“Tunah dik lo takin an himna atana thawktu mi tlawmngai (Village Volunteer) te nunna laksak an nih hnuah an ruang pawh vui hlei thei lovin Manipur sorkarin buaina a siam zui zel hi enliam mai mai harsa a ti a.
“Hetiang thil rapthlak leh hun harsa a thlen laia ZPM sorkarin kan unaute harsatna sutkian pui dan kawng zawng lo leh ngaihtuahna engmah an seng lo hi Congress thalai chuan mak a ti a. Kan unaute tawrhna hi an tawrhnaah an ngai lova, ram danga thil thleng satliah ang maia an MLA ten an sawi ta mai hi Congress thalai chuan Mizoram leh Mizo hnam thendarh tumnaah a ngai a. Hmun hrang hranga Zofate rilru na takin a hliam sak a ni. Manipur-a kan unaute harsatna leh buaina chungchangah hian an lo intiam tawh ang ngeia hmala turin Congress thalai chuan ZPM sorkar a phut tlat a ni,” an ti bawk.
