MNF Media & Publicity Department chuan vawiin (28.11.2024) chhun dar 1:30 khan Aizawl Press Club-ah press conference neiin, Manipur Chief Minister Biren Singh chu bang tura an phut thu an sawi.
MNF Media General Secretary VL Krosshnehzova chuan, Manipur Sawrkar, Chief Minister Biren Singh-a kaihhruaiin a tih tur a tih loh vang leh a tih loh tur a tih avanga an state chhunga buaina nasa tak chhuak chu chinfel ni thuai ni se an duh tih sawiin, “Hemi avanga kan unaute tawrhna zozai hi a tam ta mah mahin kan hria. Manipur tualchhung buaina chingfel zawnga hmalakna hmuh tur a awm loh lai a, buaina tizual tur zawnga hleih nei taka thuneihna hmang chhunzawm zel theia ala awm hi tha kan ti lo. Chuvangin, an Chief Minister Biren Singh chu bang ngam turin kan ngen a, he buaina avanga pawisawi lote tawrhna kal zel hi titawp thuai turin Central Sawrkar pawh kan phut a ni. Manipur-a chengten zalen taka rorelna dik hnuaia an chanvo diktak an neih leh thuai hi thil tul tawpkhawk a ni.
“Ni 22.11.2024 thleng khan Biren Singh-a kaihhruai Manipur sorkar rorelna hnuaiah tualchhung buaina avangin kan unaute zingah nunna chan 219 awm tawhin, thisen tam tak luang mekin, hliam tuar sang tam tak an awm mek a. Kristian-te biak in 360 chuang tibawrhban leh halral a ni a, chenna in 7,000 chuang meivapah chantir a ni tawh a, khaw 200 chuang an hal tawh. Heng bakah hian khua atanga umchhuah, sa himna zawnga mahni in leh lo tlansan mi 41,425 chuang an awm mek a ni,” tiin heng chhiatna leh buaina thleng zawng zawngah hian Manipur State-a hotulu ber hian mawh a phur nia an ngaih thu an sawi.
MNF Media chuan Manipur-a kan unaute tawrhna hi kan tawrhna a nih tlat avangin an tan nghet taka ding zelin, MNF chuan a maimitchhin san ngai dawn lo tih sawiin, “MNF kaihhruai sawrkar kal ta, Chief Minister huaisen tak, Pu Zoramthanga hruaina hnuaiah khan kan unaute thlavang hauh kawngah na takin ke pen a ni tawh a. Manipur, Myanmar leh Bangladesh atanga sahimna zawnga raven tlanchuuak to pawh ei leh in, chenna leh zirna thlengin alo tuamhlawm tawh a. Central sawrkar duhdan kalh rap rapa chet pawh alo ni tawh a ni. Tunhnai maiah pawh MNF Sr. Vice President hovin MNF MLA 2 nen Manipur thlengin an thlavang hauhin thawh chhuah a lo ni tawh,” tiin Mizoram Sawrkar chu kan unau, inhumhimna zawnga Mizorama awm mekte tuamhlawm kawngah leh Manipur-a kan unaute thlavang hauh kawngah huaisen takin pen zel tur leh tun hmaa an sawi thin anga hnam thinlung pu thar leh turin an phut bawk a ni.
