Tun hnaia Manipur State tualchhung buaina avanga Manipur-a cheng Zohnahthlak Hnam pual pawl hrang hrangte intél khawmna tura din thar “Indigenous Tribal Leaders Forum (ITLF) hruaitute chuan vawiin Ni 19.5.2023 chhun khan an Chairman, Pagin Haokip hovin hruaitu mi 17 ten Central YMA hruaitute an kawm a, R. Lalngheta, Central YMA hovin hruaitu engemawzatin an lo dawng sawng a ni.
Zohnahthlak Hnam hrang hrang hruaitute intêl khawmna ITLF Chairman Pagin Haokip chuan, buaina kan neih tirh phat atangin YMA hnena kan tluk luh hma leh tanpuina kan dil hma hauh atangin Inpui nih tlin takin kawng engkima tanpuina an hmuh avangin lawmthu an sawi a. Zohnahthlak Hnam hrang hrangten unau hmel hài lo nei tawh thin mah ila, Pathian remruat angin tunah chuan kan duh emaw duh lo emaw Mizoram mipuite kutah kan rawn tlu lut ta a, in unauna tha tak nen kan harsatna tawh mek pawh hi kan hma chhawn thei tawh dâwn a ni, a ti a. Kan hmalam hun atan kawng tinrengah kan Inpui nghaktu Mizoram mipuite, in mi tanpuina leh chawmdawlna kan ngen tak meuh meuh a ni, a ti bawk.
Central YMA aiawhin President R Lalngheta chuan Manipur-a kan Zohnahthlak thenkhate chungah a Mizo leh YMA ang pawhin lâwm chiah lohna te pawh lo nei thin tawh mah ila, hun kal tawh theihnghilh vekin kan unau ten harsatna in tawh hi kan chunga tla ang tho a ni a, kan inkuangkuah theihna bân hian fân tawp a nei theia a rin loh thu a sawi a. Nunau leh tarchaklo zawk rawn tlan thla te pawh a thlum a âl kan ei za zel ang tiin a lo thlamuan a ni. In pianthar tak avangin kan lawm a, da leh ngai tawh lo ula tih hi YMA te chuan kan duh dan a ni, a ti bawk.
He hunah hian ITLF hruaitute leh Central YMA hruaitu engemawzat ten thu sawiin boruak tha tak hnuaiah hun an hmang a ni.
Vawiin vek khan Tripura-a Zohnahthlak Darlong leh Marak mipa vek 18, Manipur-a eibar zawnga awm, buaina avanga tangkhang ta te chu Churachanpur a YMA hruaituten Aizawl rawn thawn thlengin, Central YMA te hian an office Tuikhuahtlangah an lo dawng sawng a, tukthuan an lo buatsaih sak hnuin, zanin tlailam khan Sumo 2 hmangin Agartala lam an thawn thla ve leh nghal a ni.
