Kan ram leh hnam humhim turin MNF sawrkar aia huaisen leh chak Mizoram in a la nei lo. Manipur a kan Zohnahthlak unaute’n inrelbawlna hran (separate administration) an phut hi MNF chuan a thlawp tlat a ni. – MNYF Headquarters.
Vawiin khan Zodinpuia, MNYF Vice President chuan Aizawl Press Club-ah chanchinthar lakhawmtute a kawm a, “Zohnahthlak unaute tanpui tura huaisen taka ding thin Chief Minister Pu Zoramthanga kan chhuang hle a. Manipur Zohnahthlak unaute tana Chief Minister Pu Zoramthanga hmalakna ngaithei lo a Meitei misual thenkhatin Pu Zoramthanga thlalak/lim hmun hrang hranga an hal hi MNYF Headquarters chuan Chief Minister Pu Zoramthanga ropui zia an tarlan na ah a ngai a.
“Khawvel hmun hrang hranga cheng Zofate tana Pa nih tling MNF President leh Chief Minister Pu Zoramthanga kan nei hi MNYF Headquarters’ chuan a chhuang tak zet a ni. Manipur state a Zohnahthlak unaute’n inrelbawlna hran (separate administration) an phut hi MNF chuan a thlawp.
Manipur state a cheng zofate leh zohnahthlak MLA 10 ten inrelbawlna hran phut a hma an lakna hi MNF chuan a thlawp a, kan unaute himna tur hian theihtawpin ke a pen zel dawn a ni.
“Hetihlai hian Manipur Assembly-a Zohnahthlak MLA 10 te hnenah Manipur CM ruahmanna in show cause notice pek an ni a. Manipur a kan Zohnahthlak MLA 10 te pawh an thu ah nghet taka dingzel turin MNYF chuan kan beisei a, a kiangah MNF chu a dingreng dawn a ni.
“Nimin mai khan Meitei pawl thenkhat, Coordination Committee on Manipur Integrity (COCOMI) te chuan khawvel hriat a kan zohnahthlak unaute hmai tihbalhna tur leh, Manipur-a Meitei mipui chetdan tenawm tak hliahkhuhna tura National war against Chin-Kuki Narco Terrorist an puang ve ngawt mai kha MNYF chuan nuihzathlak a ti hle a. Manipur buaina chinfel a nih thuai theihnan inrelbawlna hran (separate administration) pe thuai turin sorkar laipui pawh MNYF chuan kan beisei a ni.
“Myanmar leh Bangladesh tualchhung buaina avangin Mizoram ah sahimna zawngin kan unau tamtak an rawn tlanlut a. Heng kan unau raltlante hi India sawrkar chuan United Nation Refugee Convention 1951 leh 1967 protocol pawmtu a nih loh chhuanlam a hmangin a tuamhlawm theilo a ni. Hei mai bakah kan Zohnahthlak unaute hi Mizoram a luhtir pawh a rem tilo hial a.
“Hetiang hi India sawrkar dinna a nih avangin India ram state dang a raltlante chu an state Police ten man in, mi tamtak lungin ah te an khung hial a ni. Mizoram ah chuan Chief Minister Pu Zoramthanga’n, “Myanmar leh Bangladesh atanga raltlan rawn lut te hi kan unaute an ni a, Mizoram sawrkar chuan kan lo tuamhlawm a ngai a ni’, tiin sorkar laipui thu a dodal a, vawiin thlengin kan unau mangang taka awmte chhawmdawl hna hi kawng hrang hrangin Mizoram sawrkar chuan a la kalpui reng a ni.
“Mizoram sorkar chhinchhiah danin tun dinhmunah Manipur atanga Zohnahthlak raltlante hi District hrang hrangah mi 10,091 an awm mek a. Aizawl 3537, Champhai 232, Kolasib 3558, Khawzawl 64, Saitual 2440, Serchhip 54, Mamit 109, Lunglei 63, Hnahthial 8 leh Siaha 11 an awm a ni. Manipur a kan unau harsatna tawkte tanpui tur hian Mizoram sorkar chuan Buhfai bag 9552 a thlawn chhuak tawh bawk a ni.
“Bangladesh atanga Zohnahthlak raltlante hi Lawngtlai district chhunga khaw hrang hrangah mi 773 an awm mek bawk a. Parva III ah 215, Vathuampui 67, Mautlang 66, Chamdur P-I 100, Hmawngbu 101, Bungtlang South 10, Hruaitezawl 75, Hmunnuam 30, Tuithumhnar 109 an awm mek a ni.
“Tin, Burma buaina vanga sahimna zawnga Mizoram lo lut District hrang hrangah mi 34,278 an mek a. Heng Burma raltlante hi lo lut an awm mek laiin haw chhoh leh an awm deuh reng a, sawrkar chhinchhiah danin Aizawl Dist ah 3366, Champhai Dist 12209, Hnahthial Dist 1145, Khawzawl Dist 168, Kolasib Dist 159, Lawngtlai Dist 5701, Lunglei Dist 2556, Mamit Dist 484, Saitual Dist 109, Serchhip Dist 509, Siaha Dist 7872 an khawsa mek a ni.
“Kum 2021,June thla ah Assam sawrkarin Mizoram min rawn chuhpui avangin India ram chhung a thil thlengkhat tak silai hial hmehpuah a ni a. Assam police 5 silai a kahhlum an nih bakah; Mizoram rawn tihbuai tum Assam lam mi 60 vel zetin hliam an tuar hial a ni. Hemi tum hian Assam police leh an sipaite chu Mizoram sawrkar huaisenna avangin um kir an ni a. Chief Minister Pu Zoramthanga huaisenna avangin vawiin ah chuan Assam lamin hunrei tak an lo ta neih tawh thin ram te pawh harsatna awm lovin Mizoram chuan kan cheibawl chho leh thei ta a ni.
“Hei mai bakah hian, Tripura nen kan ramri chungchang ah pawh Mizoram sawrkar chuan huaisen takin hma a la a, Zampui ah Village Council thar pawh MNF sawrkar chuan a pe tawh a ni.
“Zofate inpumkhatna hi MNF in a ngaihpawimawh a nih avangin sawrkarna a chan atangin nasa leh zual in hma a la a. Kan thenawm state hrang hrangah Zofate inpumkhatna tur atan ‘Zofate Inpumkhatna Kut’ a buatsaih tawh a.
“Hei bakah hian, Tripura a cheng Zofate nen in unauna tha zawk kan neih theihna turin ‘Inpumkhatna Bus’ ti a hming vuah chu kum 2022,May ni 9 khan Aizawl – Behliangchhip, Tripura ah tlan tir a ni tawh bawk a. Myanmar, Tahan leh Manipur ah te pawh ‘inpumkhatna Bus’ hi tlan tir tura hmalakna thui tak a kal hman a. Hei erawh chu tihhlawhtlin mai theih a ni ta rih lo a ni,” a ti.
