Aizawla professional boxing bultan tur Manipuri boxer paliin ziah fel ngai an ziak fel a, an beih tur khawtual tlangvalte aia thiamna nei tha leh chungnung zawk vekah an inngai.
Inrinni zanah Dawrpui Multipurpose Centre-ah Mizo fighter hmachhawn turin Hotel Regency, Zarkawtah Manipuri team an inkulh mek a, an inhnekna tura ziah fel ngai an tihfel hnuah an beih tur Mizo boxer-te an hmuh dan sawiin, mahni khawtuala hnehna chang zo lo vek turah an ngai a ni.
Head coach Prem Kumar chuan Mizorama a fehchhuahpui Manipuri boxer-te chu engkimah a ring tawk a, an khelh tawh dan atangin an chak vek dawn tih a chiang a, hnehna changa professional boxing bul an tan theih dawn avangin a lawmawm hle a ni, a ti.
Vairengte tlangval Zoengmawia Hlondo chuan a vawi khat nan professional boxing a khel dawn a, a bitum tur Laikhuram Shanti Kumar chuan a huphurh loh tih a sawi. Zoenga’n a vei lam hnek rang hle mah se veikhawr a nih avangin a dang hneh dawn a, hnehna a chang dawn mai ni lovin a knockout theih hial a inring a ni.
Republic Veng boxer Zochhuanawma Fanai pawhin professional luhchilhin amah ang bawka bultan ve tur Thokchom Sagar Meitei nen an intawng ang. 2021 Manipur champion Thokchom chuan Zochhuana’n thiamna a nei a, mahse, thahrui a neih loh bakah a hnek chhuak tlem a, round hnihnaah nuai chauin a hnuah a hnek tluk theih ngei a beisei.
L Ronalson Khuman chuan a khelhpui tur vawi hnih chak zawn lai C Lalhruaitluanga chu lawi chal nen a tehkhin ve thung. Boxing thiamna a tlachham a, a khelh hnuhnuna a chak chhan chu tharum a neih vang a ni a, tunah chuan thluak hmanga an inbeih dawn avangin a awlsam dawn a, lawi chal angin a nawr thei tawh dawn lo, a ti.
AK Naoton Meite chuan LPS Pro Fight bantamweight champion lo ni tawh HC Lalramfela hneh turin thiamna leh theihna a nei tha tawk tih a sawi bawk. A khelhpui tawhte an thiam loh avangin thiam angin Ramfela a lang a, inrinni zanah tu zawkin nge knockout rang ber record siam ang tiin a cho hle a ni.
Manipuri boxer-te hian Clast of the Stars-a inlan tur zai thiam G’nie leh lemchan thiam Papuia Pachuau an hriat thu an sawi bawk a, Mizo mi lar pahnih hi round li chhung an inhnek dawn a, LPS pay-per-view hmangin pek chhuah a ni ang.
