Vawiin dt. 19.09.2023 (Thawhlehni) khan Mizo National Youth Front Hqrs. buatsaihin Martar te Ni pualin Two Wheeler Rally neih a ni a. Thuampui AMC Building atanga tlan chhuak tanin Vanapa Hall ah a kharna neih a ni.
Kharna hunah hian Deputy Chief Minister Tawnluia chuan thu sawiin, Ram leh Hnam tâna an nunna hlu tak hlantu Hnam Martar te tân Two Wheeler Rally buatsaih a ni thei chu lawmawm a tih thu sawiin, Martar te chu zahna chibai a buk a. Tawnluia chuan Hnam Martar te chu Mizo hnamin zalenna kan neiha, awpbehna aṭanga zalenna kan hmuh theihna atana beitu, i tân leh ka tâna an nunna hlu tak hlantute kha an ni a, ṭhalaite hian i hlutin i chawimawi ang u, a ti a. Kan hnam Martar te’n kan ram leh hnam an hmangaih avànga mahni inphatsana, an nunna hlu tak an hlàn ang hian ram leh hnam chhan turin Ṭhalaite’n kan rilru i sawh nghet deuh deuh ang u, a ti a.
MNF Sr. Vice President chuan kan Hnam Pasaltha te khan ‘Kan ram leh hnam tân Kan thawh theih tawkte thawk zovin thangthar te chhunzawm atân kan hlàn ta e,’ an ti a. Keini Ṭhangtharte te hian engtin nge kan chhan dawn le? tiin kawng hnih khat talin Mizoram tân i inhlan thar leh ang u, tiin kalkhawm te a sâwm a. Martar te chu kan hnam tâna meichher kengtu te an ni a, kan ram leh hnam tâna ke kan penna kawngah kawng kan zawh sual dawn pawhin an meichher eng ken kha hre rengin ram leh hnam tân chakna thar kan neih theih nân i hmang ṭhin ang u, a ti a. Hnam Martar te hian kan hnam an ti zahawm a, ṭhalaithar te ah inpumpekna leh lungrualna thlen zel se a duh thu a sawi bawk a ni.
Tawnluia chuan Remna chungchang sawiin mi ṭhenkhat te’n MNF chu an in-surrender, zalenna an sual peih tawh lo, tiin an sawi ṭhin a. Hei hi thu dik lo a ni a, thu dik tak chu hei hi a ni – ‘MNF hi an in-surrender lo a, Zorama pawl hrang hrang leh party hrang hrang te, Kohhran hrang hrang te’n remna a awm theihna atân theihtawp chhuahin hma an la a, remna a awm theihna atân tiin kawng te zawh a. Hetianga kawng hrang hranga hma lak a nih takah chuan Zoram mipuite duh dan angin remna chu siam a ni ta a ni, a ti a. MNF te hian an thawh peih tawh loh vang emaw an peih tawh loh vang emaw ni lovin Zoram mipuite duh dan ang zawkin remna chu kan siam ta a ni, tiin a ni lo zawnga sawi ṭhin te hian bansan tawh se a duh thu a sawi bawk a ni. Pu Tawnluia chuan Zohnahthlâk zawng zawng te rorelna pakhat hnuaia awmtir hi MNF Policy a la nih reng thu sawiin India sorkarin kan unau râltlan te ngaihsak lo mah se MNF Sorkar chuan an tân theihtawp a chhuah zel tur thu a sawi bawk a ni.
Kharna hun inkhawm hi Zodinpui, Vice President, MNYF Hqrs chuan kaihhruaiin H. Lalroliana, Treasurer, MNYF Hqrs chuan lawmthu sawina hun a nei bawk a ni.