Aizawl April 5 : Excise Minister Dr. K. Beichhua chuan niminah (04/04/2022) khan Noaotla khaw daia kum 1990-a Excise force misual kut tuara thite hriatrengna lungphun a hawng a, hemi hnu hian Chhaolo-II khua atanga Beino lui panna Economic Link Road a hawng nghal bawk.
Kum 1990, October 9 khan Excise & Narcotics S.I Lalchungnunga leh Constable Hmangaihzuala te chuan ruihhlo (opium) tawlhru thinte man tumin Noaotla khaw daiah inhmu turin an inrem a, an inbiakna kalsualah ruihhlo tawlhrutute chuan Excise mi pahnih hi chemte in an vit hlum a, an tlanbo zui ta a ni.
Lungphun hawnna inkhawmah Dr. K. Beichhua chuan mihring te hi thih dan hrang hranga la thi vek tur kan ni a, heng zingah hian ram leh hnam tana thihna tluka ropui a awm lo, a ti a. He thihna tuartute hian ruihhlo do kawngah Zoram mipuite hi kan hmabak lo chhunzawm ve tawh rawh u, tiin helai hmun atang hian min au a ni, a ti.
Lungphun hawnna inkhawm hi Excise & Narcotics Department Asst. Commissioner Pu Peter Zohmingthanga’n a kaihruai a, Noaotla bialtu MDC Pu Lalrosanga leh Excise Commissioner Pu Ngurchungnunga Sailo ten thuchah tawi sawiin, Joint Commissioner Z. Lalhmangaiha’n lawmthu sawiin programme tihtawp a ni.
Siaha bialtu MLA ni bawk, Dr. K. Beichhua chuan Lungphun hawnna a hman zawhah, Chhaolo-II to Beino lui Economic link road a hawng nghal bawk. He kawngpui hi BADP 2019-2020 khan Cheng Nuai 50 senga laih a ni a, khawtlangin NREGS atanga bul an lo tan tawh chhunzawmna niin kilometre 6 tling lo hreta thui a ni.
Dr. Beichhua chuan Beino lui chu Siaha District mipuite tan kan Nile Lui a ni, tiin Ei leh bara intodelhna atana lui tangkai tak a ni, a ti a. A kalpawhna tur kawng laih tlang a ni ta chu lawmawm a tih thu leh Chhaolo khua mipuite leh loneituten tangkai taka an hman a duhsak thu a sawi bawk.
