Zanin dar 8:00 hian Maubawk Branch YMA chuan Maubawk West Kohhran Hall-ah YMA kumpuan “Ram leh Hnam humhalh” chu a hawnna hun a hmang a. Prof. Malsawmliana, Central YMA Asst.Secretary, chuan hmanpuiin a hawng a ni.
Prof. Malsawmliana chuan Kan Ram hi humhalh a ngaih thu sawiin, “Tripura, Manipur, Myanmar leh Bangladesh te nena kan ramriah buaina kan nei ngai lo. Assam nen hian kan buai deuh renga, kan inkap hial a ni. Kum 1875 ramri te kan en phei chuan kan chan nasa tawh hle a. Assam leh Meghalaya ramri, kum 50 an buaina pawh tunhnaiah inremna siamin, ramri buai hmun 6-ah remna siamin 70% chu an chingfel der a. Tumna a awm chuan kawng a awm, Ramri ah buaina a awm avangin kan ram chin hi humhalh a ngai a ni,” tiin heng bakah hian kan dinhmun lo ram hi humhalh a ngai a, mihausa ten an duh zat zat an nei a, mirethei tan in hmun neih theih a nih tak loh thute, kan inthlahdah avanga khuarel chhiana thleng thin laka kan ram humhalh a ngaih thute a sawi bawk.
Prof. Malsawmliana chuan, “Meghalaya-ah khuan state pawnlam mite tan ram lei phal a ni lo. A neite pawh hian buaina an tawk fo thin. Mizoram ah hian hnam dang miten ram an lei hi a awm zeuh zeuh a, hemi kawngah hian hnam rilru kan put a ngai a. Hnam dangin Mizoram leilung hi an nei tur a ni lo,” a ti.
Mizo nihnaah kan chian a ngaih thu sawiin Prof. Malsawmliana chuan, “Mizo hnam hi kan lian lo a, in then te tham kan awm lo. Hnam inpumkhatna kan kalpui nat a tul hle a, kan la tlem em avangin kan inngaihsak a ngai a, Mizo ah hian kan lungawiloh chuan kan hnam hi a dam lovang,” a tih bakah Tawng humhalh a ngaih thute, kan hnam chindan leh nunphungte humhalh a ngaih bakah zu leh ruihtheih thil lamah leh eirukna (corruption) lakah kan fihlim a, rilru hrisel tak kan put a nhaihthute a sawi bawk.
Kumpuan hawnna inkhawm hi Maubawk YMA president chuan kaihruaiin, Upa Lalrinchhunga chuan hunserh a hmang a. Kumpuan hawn saktu Prof. Malsawmliana hnenah hian ngaihhruina an hlan bawk.
