November ni 14 tlaia Maudarh khuaa ABCI Lung lakna hmun (Quarry) chim chu Inrinni khan Lawmawma Tochhawng MLA, Vice Chairman, HPC, Lunglei chuan a hmunah a tlawh a ni.
Lawmawma Tochhawng chuan Mizoram chhim lam kawngpui hrang hrang siam mek atana Lung ṭha lakna awm chhuna hetiang chhiatna thleng chu pawi a tiin, chhiatna avanga thite a tawrhpui thu leh lusun chhungte a tawrhpui takzet thu a sawi a. He Quarry a lungte hi Mizoram chhim lam Kawngpui siamna atan mamawhna a san em avangin, kal pangngaia kalpui leh thuai ṭul a tih thu a sawi a. “Lung ṭha lak tur a van em avangin kawngpui siam hian a tuarin, a tlo tur angin a tlo ṭhin lova, chuvangin he Quarry a lungte hi chhim lam mipuite hian an mamawh em em a ni. Kawngpui siam mekte tih ṭhuanawp leh khaw tlai anih loh nan harsatna awm thei sut kian vat vat ni se a duhawm hle a ni” tiin he chhiatna thleng avanga tlawmngaia thawk chhuak ṭhin Leite, Maudarh, Rotlang mipuite leh hmun hrang hrang aṭanga tanpuina petute chungah Pu Lawmawma Tochhawng chuan lawmthu a sawi bawk a ni.
