November ni 14-a ABCI enkawl lai Maudarh hmuna lunglakna chim avanga mi 12 laiin nunna an chan chungchangah National Green Tribunal (NGT) chuan Mizoram sorkar chu thupek khauh tak a rawn pe.
NGT hmunpui Delhi-a Principal bench -a an chairman Justice Adarsh Kumar Goel chuan, tun hnai khan Mizoram chief secretary chu he chhiatna thlen chhana mawhphurtu, mihring himna ngaihtuah lova lunglak leh lunghalna hman chungchanga mawhphurtu zawng chhuaka hremna pe turin a rawn hriattir a. Nunna chante ralna sum pek thute, contractor-in mihring himna atana dan zawm turte a zawm loh chuan hrem turte-in a hriattir a. Chutianga tih a nih loh chuan state sorkarin a tawrh zawk tur thu thlengin a hriattir a. Mihring himna atana dan bawhchhiatna a awm a nih chuan a mawhphurtute chu hrem ngei turin a ti a ni.
Chief secretary kaihhruaina hnuai-ah hemi bawhzuitu tur joint committee din turin a rawn hrilh bawk a. Joint committee-ah hian Ministry of Environment, Forests and Climate Change, Shillong-a Regional Officer; Central Pollution Control Board, Shillong-a Regional Officer; Hnahthial district bawrhsap; State Pollution Control Board-a Member Secretary; State Disaster Management Authority; Mizoram Geology and Mining Department-a Secretary; Petroleum, Explosives Safety Organization (PESO) aiawh leh Chief Controller of Explosive, Nagpur and IIT Dhanbad aiawhte an tel dawn a ni.
He joint committee hian thil thlen dan dik tak leh hremna lek a nih dan report chu thla khat chhungin NGT-ah an thehlut tur a ni. Maudarh-a ABCI lunglakna hmun chimah hian ruang 11 lakchhuah tawh a ni a. Assam-a Barpeta ami Jahindur Islam (27) ruang erawh chu zawn hmuh a la ni lo.
