Vawiin ni 16.7.2025 (Nilaini) hian Congress thalai headquarters hruaitute chuan Durtlang leh Kawnpui inkar kawng, Vairengte leh Kawnpui inkar kawng dinhmun hmunah an enfiah.
He hunah hian Congress Thalai hruaitute chuan kawng siamtu NHIDCL, Balaji leh Randu Construction hotute nen inkawmin kawng chhe lutuk leh kawng siam tawhte pawh a that loh em avangin Mizoram mipuiin harsatna namen lo an tawk tih an sawi.
Laltawnliana President MPYCC chuan, “Nikum 2023 September ni 5 khan Chief Minister Pu Lalduhoma chuan PWD Minister Pu Vanlalhlana tel lovin Sihhmuia a huan tlawh pahin Sairang leh Kawnpui inkar kawng a tlawh a. Hemi tum hian Chief Minister Pu Lalduhoma chuan interview neiin, Kawng chhia hi tu mawhphurh nge tih hi hriat thiam mai a harsa tih sawiin, NHIDCL lampang nge Mizoram PWD tih hi kan chiang lo thin a, hei pawh hi Mizoram State mawhphurhna a ni lo tiin a lo sawi tawh a. Hmai uang takin nikum 2024 October ni 9 hmaa a chhe lai siam zo turin kan tih pawh inbumna mai a nihzia phat rual lohin tunah a lang chhuakah Congress Thalai chuan a ngai a ni. Chief Minister-in, he kawng a tlawh tuma helai kawng hi NHIDCL enkawl a ni a, Mizoram sorkar mawhphurhna a ni lo anga a sawi te hi dawt hmanga inbumna a ni a, NH-06 package 8 (Kawnpui – Khamrang) bik phei chu vawiin thlenga Mizoram PWD enkawl a la ni zawk,” a ti.
Laltawnliana Sailo chuan, “Chief Minister Pu Lalduhoma ang chiah hian PWD Minister Pu Vanlalthlana pawhin June ni 30, 2025 khan he kawng pawimawh tak chungchang hi Mizoram PWD mawhphurhna a ni lo tih a lo sawi tawh bawk tih sawiin, Pu Laltawnliana chuan, engkim Research base veka hma la nghal tura inzuar sorkar hian engkim an Arkhawthim daizia a lang a. Chief Minister leh PWD Minister hian hetia dawt sawia mipui bumna thusawi kual mai mai lo hian an nihna hi midang kian se, Mizoram mipui hnena an inzawrhna Kalphung thar chu a beisei awm zawk.
“Congress thalai chuan Chief Minister leh ZPM sorkar hian kawng siamtute a thunun ngam lova, an ngenna leh nawrna pawh engahmah an ngai lo tih sawiin kawng siamtute chuan ZPM sorkar aiin Mizoram BJP President thar Dr. K. Beichhua ngenna an ngai pawimawh zawk hian ZPM sorkarah thil engkim a harsa deuh deuh dawn tih hi a lang chiang hle a. He kawngin a paltlang khua Vairengte leh Sairang inkar kawng mai a ni lo, khawchhung kawngte pawh chen hrehawm khawpin a chhia a. Khawchhungah motor lian kawng chhia avangin an tlu neih-nuaih a, chutih laiin ZPM sorkar Deputy Speaker erawh motor changkang leh manto chhungah chuangin kawngchhia an inkhar-khum san a, kawng tha neih chu thil beiseiawm tak a ni lo tih sawiin, Mizoramin kawng tha kan neih theihna turin Chief Minister Pu Lalduhoma leh PWD Minister Pu Vanlalhlana hian an nihna hi midang an ken ngam hunah chauh Mizoramin kawng tha kan neih a beiseiawm,” a ti bawk.
MPYCC President hi Khawpuimawia Treasurer, HP Lalchuailova General Secretary, R. Lalhmingmawia General Secretary te leh thalai hruaitu engemaw zat in an tawiawm a ni.
