MPCC chuan thuchhuah siamin, “Mizoram Budget Session neih mekah February ni 26, 2023 khan Home Minister Pu K. Sapdanga chuan, Champhai Jail chhiat dan chungchang a sawinaah, a bang atan rangva tun hmangin, Jail tang te zana nula rima an chhuah ṭhin thu leh zan reia Jail-a an rawn hawn leh mai thin thu a sawi ta mai hi Congress Party chuan a ngai thutak hle a. Dan leh thupek (Law & Order) kengkawh ber tura ngaih Home Minister in Jail tang mek, leng chhuak ṭhin te thil tih dan pawmpui ang zawnga tawngkam a nei hi rorelna laltiang lek tura quality a neih loh zia a tarlang chiang hle niin kan ngai a ni.
“Dan bawhchhiat avanga Jail tangten zana zalên taka nula an rim tih hre reng chunga hetiang tawngkam chhak chhuaktu Home Minister hian a hna a tlin loh zia leh a hlen loh zia a tarlang chiang hle a. Jail tang mekte mipui zinga zalen taka an leng thei hi mipui tan a him lo a ni tih hre chunga haidertu Home Minister Pu K. Sapdanga hian vanduaina thleng palh ta se, mawhphurhna ala ngam dawn lo tih a chiangin kan hria a ni.
“Sorkar kal tawh te thiam taka sawisel thin politician te hi ram rorelna fawng chelh turin an that ber lohzia ZPM sorkar hotute thusawi leh thil tihah a rawn lang zel a. ‘Enchhin Sorkar’ kan hrawn mek hi Mizoramin sorkar kan neih tawh zinga laktlak loh ber leh rintlak loh ber a ni tih a lang chiang chho mek zel a. Mizoramin hetiang hun kan hmachhawn mekah hian Congress party chuan mipuite tan he ‘Enchhin Sorkar’ hi a lipse zel dawn a ni tih kan puang nghal bawk a ni,” an ti.
