Chief Minister Zoramthanga chuan vawiin chawhma khan Mizoram sawrkarin Mizoram Civil Service Combined Competitive Exam 2022 kaltlanga MCS, MPS, MIS leh MFAS officer tur a lak tharte chu CM office Conference Hall-ah appointment letter a hlan. Kumin October ni 22 a Prime Minister in hnalak runpui Rozgar Mela 2022 a tlangzarh tak bawhzuia sawrkar laipuiin state hrang hrangte ti tura a rawn ngen anga he hun hi buatsaih a ni.
Chief Minister chuan India in zalenna a chan kum 75 na champha puala hnalak runpui kalpui a ni chu lawmawm a ti a. Kum hnih chhung chu COVID-19 hripui lengin state chauh nilo ram pum mai chu sum lama harsatna a thlen avanga hmalakna hrang hrang tithuanawpin, post ruak tam tak pawh hnawhkhah lawk theih a nih loh thu a sawi a. Tunah boruakin ziaawm lam pan in, kawng hrang hrangah hma kan sawn chho tan a ni tiin hna lak chungchangah pawh hma sawn chhoh zel beisei awm a tih thu a sawi a. Officer lak tharte chu an hmabakah duhsakna a hlan a ni.
He hun kaihruaitu Chief Secretary Dr. Renu Sharma chuan sawrkar hnathawh chu hamthatna dawn na tur ringawt ni lovin, a hmasa berah chuan mipui rawngbawlna a nih tih vawng reng turin junior officer atana lak tharte chu a chah a ni.
DP&AR Secretary R. Lalramnghaka pawhin mipui rawngbawl tura lak an nih avangin an hnathawh zelna turah theihtawp chhuah turin kalkhawmte chu a chah a ni.
Appointment Letter 34 (Mizoram Civil Service 14, Mizoram Police Service 8, Mizoram Information Service 4 leh Mizoram Finance & Accounts Service 8) pekchhuah a ni.
