MCS Officer engemawzat awmna siksawi tharah Hnahthial-a SDO (Sadar), DUDO, SO, EO leh BDO hna kawp mektu Pu Lalremruata Sailo chu a tel ve avangin vawiin khan Venglai YMA Hall, Hnahthial-ah MNF West Block, South Tuipui bial OB te leh Hnahthial khawchhunga VCP te chu thukhawmin Pu Lalremruata Sailo chu sawn chhuak rih lo turin thuneitute ngen nise an ti
He hun hi Pu J.Lalchhuana, President, MNF West Block, South Tuipui Contituency chuan kaihruaiin Hnahthial leh a chhehvel chu Congress Sorkar kalta khan a hnuchhawn tlat tih sawiin “MNF Sorkar-in District min pek pawh Congress sorkar khan kum 10 chhungin a tih puitlinna lam hawi pakhatmah a thawk lova, tuna kan Chief Minister zahawm tak Pu Zoramthanga kaihhruai sorkar chuan an sorkar atanga thla 8 velah DC leh SP min pe nghalin Covid-19 hrileng karah pawh District tih puitlinna lam hawi kawng tam takah kan hmu hi a lawmawm takzet a ni” tiin lawm nachang hre turin kalkhawm te a chah a ni.
He huna kalkhawmte chuan Hnahthial-a SDO (Sadar) Pu Lalremruata Sailo sawn a ni chu an ui thu leh Hnahthial District tih hmasawnna atan a thawhrimna te chhuanawm an tih thu sawiin Hnahthial chu District bul tan chho a nih avangin Pu Lalremruata Sailo chu an la mawmawh hle tih an sawi a, sawn lo turin sorkar ngen nise tiin MNF West Block, South Tuipui bial OB te leh Hnahthial khawchhunga VCP te chuan hetiang hian Resolution an pass nghal a ni :-
Kan Chief Minister zahawm tak Pu Zoramthanga kaihhruai Sorkar in Hnahthial leh a chhehvel mipuite mamawh leh duh tak, Hnahthial District min pe leh min tih puitlin sak mek hi kan lawm em em a, Covid 19 hrileng leh thil hrang hrang vanga sum harsatna karah pawh hmasawnna ruhrel pawimawh tak tak min chhawpchhuah sak zel hi ropui kan tiin kan chhuang takzet a, kan sorkar chungah hian lawmthu kan sawi a ni
Hetih rual hian tun hnaia MCS officer te awmna tur siksawiah mi thahnem ngai leh thawh hlawk, mipuite tan inpe zo tak Pu Lalremruata Sailo, SDO (Sadar) Hnahthial sawnchhuah a ni hi kan ui hle a ni. District bul tan chho kan nih avangin Pu Lalremruata Sailo kan mamawhna hi ala sangin a transfer order hi min cancel sak turin kan Sorkar hi kan ngen takzet a ni.
