Mizoram Football Association (MFA) chuan vawiin (23.5.2024) khan Aijal Club-ah General Body Meeting an hmang a, chawhnu lamah kum 2024-2028 chhunga MFA hruaitu thar thar a hnuai a mi ang hian an thlang chhuak : President – LaInghinglova Hmar
Sr. Vice President – PC Vanlalhruaia
Vice president – Lalruatsanga Tochhawng
Honorary secretary – Lalrengpuia,
Joint secretary – Lalrawngbawla
Treasure – C Vanlalmawia
Finance secretary – LV Lalthantluangate
General Body Meeting chawhma lam rorelah hian district 11 atanga district football association tin aiawh kalkhawmte chuan kum 2023-2024 season kal meka hmalakna hrang hrang thlir kirin, season thar lo awm tura hmalakna te an inhrilhfiah bawk.
MFA President kal chhuak tur Lal Thanzara chuan president a nih chhunga kum bithliah hrang hranga Mizoram football hlawhtlinnate sawiin, “Senior inelna Santosh Trophy, I-League leh National Games Football-a Mizoramin hlawhtlinna a chang te, Senior Men’s National Team-a Mizo tlangval thahnem tak thawh thei dinhmuna kan ding chho vete leh Reliance Foundation nena thawk dun a naupang inelna mumal taka kalpui a nite hi a lawmawm ka ti hle a ni,” a ti.
MFA Honorary Secretary LaInghinglova Hmar pawhin thusawiin, season liam tura MFA thil tawn hrang hrang a sawi a. President kal chhuak tur Lal Thanzara chu mi hawihhawm leh thawhpui nuam a nih thu sawiin, “MFA-ah politics a lalut ngai lo a. Kum 13 president a nih chhungin Mizoram football-in India rama state hrang hrang inelna chitinah a ber nihna kan chang a, Pu Lal Thanzara hian hmingthat lak a tum ngai lova, a inkiltawih zawk thin a ni,’ a ti.
