KL. Chhawnzauva LDCC President chuan “Congress party hian danglamna bikna kan nei a,engkim hi inrawntlang (Committee) vekin kan ti thin a, kan party inkhai chhawn danah pawh unit atanga MPCC thlengin committee-a thutlukna siam vek thin kan ni a, chuvangin kan party ah hian thuneihna hmansual vak theih a ni lo, langtlang taka rorel thinna party kan ni” a ti.
He thu hi vawiin a LDCC Bhawan a Political session-ah President a thlan thar a nih hnu a Party mipui hma a a thusawi hmasak berah tarlangin Pu KL. Chhawnzauva chuan “Mahni aia ram leh hnam dah hmasa a, ngaipawimawh zawk party kan ni a, Mizoramin a hun laia a mamawh ber ang zela in hlan phal thin kan ni a, Rambuai a lo reha remna leh muanna kan neih theih nana Lal thutthleng hial pawh hlan phal kan hotu hmasa te an lo ni a,tun thlengin kan ram tana tha zawk tur nia langah chuan kan dinhmun te kan ui tlat ngai lo, a hrechiangtu chu mipuite kan ni”, a ti. Congress Party chu mirethei lam hawi tlat party an ni tih sawiin kan ram retheihna atanga khaichhuaka dinhmun tha zawka a awm theihna tur te, mirethei leh harsa ten leirem an raha dinhmun tha zawk an lo neih theihna turte a policy leh programe neisa reng party an ni tih sawiin mirethei ber te ban phak sorkar siam thintu an nih thu a sawi.
Congress Party chu thutiama dingnghet tlat thin an nih thusawiin “Congress party in mipui laka a tiam tawh chu a la tihlawhtling zel thin a, Party dang aia that zawkna emaw, fel zawkna emaw kan nei lemlo pawh a ni thei, mahse kan hotuten an thusawi te hi an sawiliam ve mai mai lova, mipui laka dawtsawi te, ti tura an intiam tawh te, tihhlawhtlin loh an hlau em em thin a, an tihlawhtling zel thin a ni” a ti. Congress party mi lehsa te chu tunah hian mithianghlim leh fel ber ber an ni lo tih an in hria tih sawiin “Kan hotupa ber Pu Lalsawta ho hian rinawm leh dik takin kan ram hruai hna hi an thawk ang tih kan ring tlat a, Zoram mipui te pawhin kan ram leh hnam hruai turin mi rinawm, hlemhletna lak fihlim hruaitu kan nei tih hi hriaa min tawmpui turin kan sawm a, beidawnna min thlentu ni lova, beiseina thar min siam saktu kan nih ngei kan ring tlat a ni”, a ti.
LDCC President hian Mizoram Congress party mi leh sa te chu Pathian thu kan awih tur a ni tih sawiin Chronicle 2 na bung 6:9 chu innghah nan a hmang turin party mipui a sawm.
