Mi bum hmang, Jeremia Lalthangtura (22) s/o James Lalzawmmawia, Zemabawk Berawlui Venga mi chu December 13, 2022 khan Aizawl PS mi bumna case kaihhnawihah man a ni.
Jeremia Lalthangtura hian Zarkawta Computer dawr pakhat chu bumin Laptop pariat, Xerox Machine pahnih leh Projector, a belhkhawma Rs. 8,90,470/- man hu chu pawisa awm lo Cheque (bounced cheque) hmangin a leisak a. Chhui chhunzawmna atangin kum 2020 atanga tun thlenga inbumna thila a inhnamhnawihna eng emaw zat hriatchhuah niin, cheng nuai 75 chuang kaihhnawih inbumna thilah a inhnamhnawih a ni.
Dt. 26.11.22 khan ‘The Grand Hotel’ Chanmari ah thlengin an Conference Hall vawi hnih lai hmansakin, a bill, Rs 1,34,231/- chu bounce cheque bawka pein a bum bawk a ni.
Document lem hmanga Loan lak te, Cheque, account-a pawisa awm lo hmanga thil man to tak tak lei te, Online Marketing hmanga mi bum te, etc. a ti thin tih hriat a ni a. Mi a bumna avanga Case ziah luh sa hi pariat lai a awm tawh nghe nghe a ni (Bawngkawn PS-ah 5, Aizawl PS-ah 3).
Tunah hian a hnen atang hian Laptop – 8, Xerox Machine – 2, Projector – 1 leh Wireless Mouse – 8 hmuhlet tawh a ni a, thil dang pawh chhui chhuah tur a la awm zel beisei niin, chhui chhunzawm mek zel a ni.
