izo Zirlai titha chawimawina hun, MZP Sub Hqrs. Bilkhawthlir huaihawtin vawiin khan Bilkhawthlir community hall-ah hman a ni a. Pu Lalrinsanga Ralte, MLA Serlui constituency, Vice Chairman, Rubber & Allied crop Dev. Board chuan khuallian niin he hun hi a hmanpui a ni.
Lalrinsanga Ralte chuan zirlaite fuihna thu sawiin, “Midangte aia penkhat tala ke in pen hunah hlawhtlinna kawng in zawh thei chauh ang,” a ti a. MLA fund hi bial mipuite ta, kan intawm vek a ni. Ka bial chhunga zirtirtu leh zirlai te thinlungah, hmundanga mite in phak ve zia lantirnan, bialchhung zirna in atanga broad exam-a Distn a pass te lawmpuinan laptop leh thilpek dang kan pe thin a. He bial hian sawrkar hnathawk sang leh pawimawh chherchhuak se, chutiang tur chuan zirtirtu leh naupangte in pawimawh em em a ni,”tiin, zirtirtute pawhin hlawh hmuh nan chauha an hna thawkloin, naupang, chhungkua, khawtlang leh ram hmasawnna kawngah mawhphurhna an neih thu a sawi. Naupang chherna kawnga tui tawhlo te chu chawl ngam mai tura a duhthu a sawi bawk.
Zirlai naupang kalkhawmte fuihin, khuallian chuan,” Zirlaia kan pass hi kan hlawhtlinna a ni mailo a, inpumpekna, tumruhna leh mahni inthununna nen, tum mumal tak nen ngil takin hmalam in pan tur a ni,” a ti. Ram leh hnam humhalh nan zirna kawngah nasa lehzuala hma kan lak a tul a. Kan state sawrkar hnathawk sang zawng zawngte chu hnamdang an ni ta vek a, hei hian nghawng thalo aneih theih avangin zirlaite chu nasa lehzuala tang tur leh tlawmngaihna leh rinawmna nen, ruihhlo laka fihlim a pawimawh thu a sawi bawk. Social media hman kawngah pawh, chintawk hriatthiam a tul thu leh, thudik ngaihtuah leh tan tlat chunga engkim ti fo thin turin a chah bawk.
He hun hi Lalduhzuala, Vice President, MZP Sub Hqrs. Bilkhawthlir chuan a kaihruai a, Lieut. B.K Luna, Commanding Officer, Bilkhawthlir CO bial chuan hunserh hmang a hmang a. He huna khualzahawm, Pu Timothy R. Lalhmangaiha, BDO, Bilkhawthlir RD block chuan zirlai leh kalkhawm te thuchah pawimawh tak tak a sawi bawk. Pu VL Krosshnehzova (Ex President, MZP Gen. Hqrs) hnen atangin zirlaite fuihna thu pawimawh tak tak ngaihthlak a ni bawk. Nl. Vanlalmalsawmi, Treasurer, MZP Sub Hqrs Bilkhawthlir chuan lawmthu sawinain hun a titawp a ni.
