Mizorama Govt. Ad hoc Aided school hrang hrang hruaitute chuan vawiin khan Joint Meeting neiin, Pu Zoramthanga kaihhruai MNF sawrkarin Provincialise status-a a hlankai ngei theihna turin a huhova hmalak tlan zel tha an ti.
Mizorama Govt. Ad hoc Aided Teachers Union (MIGASTU) chuan, anmahni duhsaka upgrade thintu Pu Zoramthanga kaihhruai sawrkar a lo ding chhuak leh ta hi an lawm hle nia sawiin, beiseina sang tak pawh an nei hman a. Amaherawhchu, an chanvo tur dik tak Provincialise status pek lohva kum tam tak an awm ta hi hrehawm an ti takzet tawh tih an sawi a. Chuvangin, an hruaitute joint meeting chuan Pu Zoramthanga kaihhruai MNF sawrkarin Provincialise status-a a hlankai ngei theihna turin hetiang hian hmalakho zel dan tur an rel:
1. Kan chanvo tur dik tak Provincialise status kan hmuh ngei theih nan na takin sawrkar nawr nise kan ti a, kan dinhmun dik tak sawrkar leh mipui hriatah puangzar turin Press conference pawh neih thuai nise kan ti.
2. Provincialise kan nih ngei theih nana hma laksak turin Chief Minister hmuh thuai nise, pangchang takin ngen nise kan ti bawk a.
3. Govt.Ad hoc Aided school teachers, High School leh Middle School-a thawk zawng zawngte kan tana sawrkarin a hmalak chin te thlirho a, a tul azira na zawka sawrkar nawr dan tur pawh ruahman zel turin Joint Conference neih thuai nise kan ti bawk a ni.
Vawiina Mizoram Govt. Ad hoc Aided Teachers Union (MIGASTU) hruaitute meeting chuan anmahni hringtu MNF sawrkar lakah beiseina sang tak an nei tih sawiin, anni anga zirtirtu senior fal an awm tawh loh avang te, Provincialised Rules neisa thlap an nih avang te leh pawisa sen belh tur pawh a tam tawh loh avangin sawrkar tan Provincialise hi thil harsa ni lovin an ngai a ni.
