MHIP DAY VAWI 49-NA PRESIDENT THUCHAH
– Ngurmawii Sailo, President MHIP General Headquarters
Tlang hrang hranga Mizo hmeichhe Insuihkhawm Pawl member zawng zawngte, kan hruaitu hmasa zawng zawng te nen kumin 2023 MHIP Day vawi 49-na lawmawm tak a lo thlen hian MHIP Day chibai ka buk a che u. He hun min hruai thlengtu Pathian hnenah lawmthu ka sawi e.
Kan ram leh hnam hmasawana tur leh a chhe laite siamtha tura nasa lelizuala tan la theuh turin MHIP member te ka sawm che u a ni.
1. Tunlai khawvel hmasawnna thangduang tak karah hian Pathian tihna tak tak nei turin kan fate kan kaihhruai a ngai hle a. Thalaite zingah pawnlawi taka sakhuana kalpui leh social media a thalo zawnga hmanna a nasa hle a, a pawi a ni. Keimahni ngeiin kan fate kan inchhungkhurah kan zirtir a rilru that nen chhungkua a Pathian tih mi ni turin tan i la that theuh ang u.
2. Ram leh hnam vei turin kan fate kan zirtir a tul a. Thalaite zingah ram leh hnam hmangaihna chang hre lo tam tak an awm ta. Keini an nute hian Israel fate angin kan fate hi ram leh hnam hmangaih nachang hre tur leh chutiang rilru pu chunga engkim ti turin kan zirtir a ngai. Silai leh hmanraw dang nen ramri kan pan ve thei lo, mahse, an thinlungah ram hmangaihna chi kan tuh nghet thei a ni. Tin, hnam dang nupui pasal nei lo turin zirtir ila, kan hnam boral lohna turin kan theih tawk theuhah tan i la thar ang u.
3. Hmeichhiaten kil hrang hrangah hma kan sawn viau lai hian kan mipate ber an hnungtawlh loh nan nu ten mawhphurhna kan nei a. Sual laka vennan kan fapate inchhungah awm awltir mai mai lova kan chhawr hriam a, ram leh hnam tan an hlutzia kan hrilh fo a tul hle.
4. Kan Motto “Mite tanpui’ tih a nih angin hmeithai leh fahrah te, chanhaite chhawmdawl kawngah tan la zel ila. MHIP branch hrang hrang ten kan thenawm Myanmar. Bangladesh leh Manipur State atanga raltlan lo kalte pawh kan theih ang tawk theuhin kan tanpui a MHIP Gen. Hqrs. hmingin lawmthu ka sawi a, Samari Mi tha thinlung puin kan awmhmun theuhah tanpui ngaite tan i che chhuak zel ang u.
5. Mizo Hmeichhiate hi kan ram siam tha tur leh kaihruai tur hian kan tha tawk a. Zoram tan thil tha tam tak kan ti thin a, kan ti zel ang. Kan hma lawka MLA General Election lo awm turah pawh hian insit miah lovin rawn pen chhuak teh u khai, kan ram tan hian Mizo hmeichhiate hian lungrual takin tan i han la tlang zel teh ang u.
Dikna Ich rinawmna vawng nung zel turin ka sawm tak meuh che u a, Pathianin vengin awmpui zel che u rawh se.
ZOFATE TAN MHIP VUL RENG RAWH SE
