Vawiin ni 19.9.2024 (Ningani) hian Congress Thalai chuan Zuangtui godown-a buhfai dahna in pathum endikin, heng buhfaite hi Grade ‘A’ leh grade ‘C’ tihchian a ni lo a, mipui hnena buhfai tha lo pek hi Congress thalai chuan Chief Minister en turin CMO-ah an pe a ni.
Pu Laltawnliana chuan, “Ration Buhfai chhia ei ngaihna kan hre lo, Vawk pul hri avangin vawk chaw atana hman theih a ni lova, lei tha atan te an hmang mai mai a. Hetih lai hian ZPM sorkar chuan ration buhfai kg 1-ah cheng 30 (100%) in October thla atanga a tihsan tur chu Mizoram mipui an lungngai takzet a, kan sorkar hrawn mek hian miretheite lû chunga vaivut takngial pawh an ît a, pachhiate an rûksak mek a ni,” a ti bawk.
Central sorkar atanga Buhfai a thlawna kan dawn bak hi a supply tu tur Mizoram sorkar chuan tender chhuah in a thlang thin a. Mizoram hian thla 1-ah Buhfai quintal 59,478 a thlawnin sorkar laipui atangin kan dawng thin a, hemi baka kan mamawh nia Supply Minister-in a sawi chu Quintal 37,522 a ni.
ZPM sorkarah Buhfai supply hna chhangtu pariat awmin, RL Store, Kulikawn Aizawl chuan chhang hniam berin, Buhfai Quintal 1-ah Rs. 3,400.50 in an supply thei a. Buhfai supply tur thlanna (Limited Tender) ah a chhang hniam ber pek ni lovin an duhsak zawng te hnenah Rs. 3,550/- in supply tir an ni a, a supply tu turte hian midang supply tir lehchhawn nia hriat a ni a, hetah hian thil dik lo tam tak Congress thalai chuan a awmin a hria a. Chuvang chuan mipui hnena thil nihna dik tak puang chhuak turin ZPM sorkar hi Congress Thalai chuan a phut tlat a ni.
Hetianga uchuak taka induhsakna hleihluak tak avang hian kum khatah Mizoramin Rs. 67,314,468.00 a chawi thlawn dawn a, mi tlemte hlawkna Mizoram mipuiin an tuar chho zel tur hi Congress thalai chuan vanduai thlak a ti takzet a ni.
ZPM sorkarin buhfai tha lo mipui hnena a semchhuah hi Congress thalai Office-ah a duh apiang tan en theihin a awm reng a ni.
