Millennium Centre-a grape wine zawrhna dawr neitute chuan 2022 May 27-a Excise & Narcotics Department-in an dawr an dapsaknaah tualchhung siam grape wine ni lo, a senchi (IMFL) leh Korean siam zu bakah beer man tel anga END-in an sawi chungchangah, END-te thil man list, a thla an lakah a tel lo tih an sawi a. Tualchhung siam grape wine bak chu apple juice an man.
Millennium Centre-ah hian grape wine zawrhna dawr pali a awm a, dawr pahnih hi a neitu mi pakhat a ni. Dawr nei pathum an awm tihna a ni. Dawr pahnih neikawp hnen atang hian Champwine um puitling 4212, a chanve um 3240, Fanai wine um 294, BCH wine um 232 an man tih ziah a ni.
Dawr dang pakhat atang hian plastic gallon-a dah tualchhung siam – grape wine litre 20, um (650ml) a dah grape wine tho um 17, apple juice (1 ltr) um 15, apple juice (500 ml) um 4, Champwine (375 ml) um 4, Champwine 750 ml case khat, Champwine (375 ml) case 7 tih chu an ziah dan a ni.
Dawr dang pakhat atang hian Champwine a chanve um 518 leh tualchhung wine plastic gallon 6 (49 litres) man a ni tih a inziak. Dawr pahnih neitu hian END thil man hlut zawng hi cheng nuai 25 tling thuak a ni tih a sawi a. An vaia an thil mansak hi nuai 28 chuang hu niin an chhut.
“Kan dawr atanga an thil man an ziah tlar hi min pe ve loa, amaherawhchu mobile phone thlalakin a list hi a thla kan la a ni,” tiin MC-a wine zawrhna dawr neitu pakhat chuan chuan a sawi.
2022 Kune 6-a Excise & Narcotics department thuchhuak chuan May 27-a Aizawl khawpuia zu an dapnaah hian Millenium Centre bikah Korean zu (Soju) leh beer an man tel niin an sawi a. ‘Dark wine’ an man tih an sawi bawk.
Millennium Centre Dawrkai Association thuchhuak chuan May 27-a Excise & Narcotics Department-in zu an check-na lama Millennium Centre chhunga grape wine leh Mizoram tharchhuah wine dang an man tel chu pawi a tih thu a sawi.
Sawrkar leh grape chingtute lamten inhriatthiamna kara thlamuang taka an eizawnna an kalpui lai a, an thil zawrh lai zawng zawng mansak vek an ni chu pawi an tih thu sawiin, sawrkar hian pe let leh se an duh a; an pe let lo a nih pawhin an mansak ang hu tal zangnadawmna pe ngei se tih chu an duhdan a ni tih an sawi.
Hetihlai hian Champhai leh Hnahlana grape chingtuten wine an siamchhuah theih nan dan siamsak an nih theihna atan eptu party-te atangin an rawtna hi an dodal lo tih sawina tunlai hian an khawnkual mek a. Eptu party-te ngaihdan hi an dawng kim tawh nia thu dawn a ni.
