Vawiin October ni 3,2022 (Thawhtanni) khan Congress Party Devotion chu Upa LH Rohmingliana, Speaker, Evangelistic Team chuan hmanpuiin ‘Ram chu Lalpa ta a ni’ tih hmangin thu a sawi. Pathian hnena inhlanna inkhawm hi Pu Lalrindika Ralte, MLA in a kaihruai a ni.
Upa L.H Rohmingliana chuam, Israel rama rorelna a dik lohin ram a dam loa, sakhuana Kohhran pawh a na a, ram pumpui a na. Roreltute pawhin mi rethei luchunga vaivut thlengin an it. Khatiang dinhmun kha kan hlat lo, kan ram hi a dam lo tak zet a ni. Nimahsela, kan ram natna tidam turin Pathianin kan nei. Kan ram damna atana a damdawi chu sual sim a ni. Thil tha lo leh dik lo bansan a, thil tha ti tura hmalam kan pan angai. Kan Bible chuan, Rorelna fel zawng tur leh, hnehchhiah tuar te tanpui a, hmeithaite leh pa nei lo te fel takin rorel sak turin min phut a ni, a ti.
Speaker, Upa LH Rohmingliana chuan, Pathian hi miretheite lamah a tang a ni. He party hi Pathian lamah tang rawh u. Chutiang a nih loh chuan in ti fuh lo ang. Sum hi kan ram damdawi a ni lo. Mi thawm na vut vut kan mamawh lo, mi dik, rintlak, Rorelna fel, Pathian thuawih hi kan ram damna tura a damdawi a ni. Lalpa rawngbawl hi kan ram damdawi a ni a, kan ngaih pawimawh ber a ni tur a ni. Pathianin a lamtang tur mihring a zawng, Lalpa lamtang tlat mi Lalpa’n a duh a, a zawng mek a ni. Ram chhana a hmaa tang tur mi a zawng a ni. Lalpa lama tang lo chuan Lalpa a do a ni. Lalpa lama tang te chu a lama an tan chhung an lamah Lalpa a tang zel ang a, a rinawmna leh thatna an hmu ang, tiin khawlkhawm te a chah a.
Upa LH Rohmingliana chuan, Mizoram mipuite hian he ram hi Lalpa lalna, Lalpa duh zawng rorelna siam leh dinthar hi kan tum a ni. Mahse, sual lama tang ru chung chuan he ram hi kan siam tha dawn lo. Unit, Block leh Headquarters a kan rorelna leh hmalaknaah pawh Pathian lamtang nih a pawimawh ber. Pathian duhzawng rorelna dik, mi zawng zawng thatna tur, mirethei leh a hniam ber te thlenga that tlanna tur rorelna leh thinlung put a tul.
Tunah Mizoramah Party pathumin tan in la em em a. Pathianin tute nge rorelna a pek leh dawn kan hre lo. Mahse, he ram rorelnaah hian ram tana inthawhnaah hian a laipuiah Lalpa tang tlat rawh se, chumi a nih chuan a chhiat mai mai theih loh. Kan ramah party a tel lo, in hmang lo, mahse, pawimawh si kan awm teuh, chungte chu kori an tu hle dawn tih in hriat a ngai. Chungte chuan zui tlak mihring an duh. Lalpa lamah in tan phawt chuan That loh theih lohna bawm siam tirin hlawh tlin loh theih lohna bawm in siam thei ang. Mimal hamthatna buaipui suh u, Lalpa lamah tang rawh u. Chu chu kan ram damna tur a ni. Lalpa lama tang tlat mi pakhat chauh pawhin thil nasa tak a ni thei. Chu chuan hnam leh sakhua nasa takin a ti danglam thei a ni, tiin Upa LH Rohmingliana chuan Congress Party te a fuih a ni.
