Aizawl, April 13 : Human Resources Development Board (HRD) Vice-Chairman, Lengteng Assembly Constituency bialtu MLA ni bawk Pu L.Thangmawia chuan thawhtanni khan a bial chhunga Kawlbem SHP (Mini Hydel Project) hna thawh mek a tlawh a, Pu PB Laltanpuia, EE, Ngopa Hydel Division leh Nortech Power Project (P) Ltd a thawk ten an lo dawng sawng. Pu Arun Thakur, Supervisor, Nortech Power Project chuan MLA hnenah hian khawlbun hna hi an zawh tep tawh thu leh tluang taka an thawh chhunzawm theih chuan kumin June thla ral hmain zawh fel hman an in beisei thu a lo hrilh a ni.
Pu PB Laltanpuia, EE, Ngopa Hydel Division chuan Kawlbem SHP Megawatt 4 pe chhuak thei tur hi kum 2014 a thawhtan a nih thu leh kum 2017 a zawh tura ruahman a nih thu te, harsatna tam tak avanga a hun taka zawh hman a nih tak loh dante MLA hi a lo hrilhfiah a, he project atan a sum ruahman chu cheng nuai 4960 a nih thu sawiin, heng zinga cheng nuai 3200 hi NABARD loan atanga hmuh a nih thu leh cheng nuai 2000 hi MNRE grant leh SMS cheng nuaih 142.10 te an nih thu bakah Physical work chu an zawhfel tawh thu te a sawi a, a khawl bun tu ten an zawh fel veleh commission theih nghal mai a ni dawn tiin he project atan hian a zawh hun tur aia tlai feah zawh ngai mahse Revised Estimate siam a nih loh thu te MLA hi a lo hrilh bawk.
Pu Thangmawia chuan he project hi kum 2020-a a lo tlawh tawh thu leh Nortech company te pawh chak zawka hnathawk tura phone mai bakah DO letter nena a lo ngen tawh thu a sawi a. A power pek chhuah zawng zawngte hi Mizoram ta tur a nih avangin tuna thawh zawh mai tur a lo ni dawn ta hi a lawmawm hle a ni tiin hnathawk tute chu harsatna an neih apiang inthlahrung lo va hrilh thin turin a chah a, a tih theih chinah theihtawp a lo chhuahpui zel tur thu a hrilh bawk a ni.
Nimin chawhma khan Pu Thangmawia hian Chief Minister in SEDP sum hmanga Mimbung to Sinzawl inkar Tuivai lei chhuat thira thlakna tur a tihsak hna thawhzawh tawh chu a hmunah a en a. He hnathawktu tena a beisei aia an thawh that a vangin lawmthu a sawi bawk a ni.
