Min rûntu Assam demna leh kan ram atanga inla chhuak tura Assam phutna Mizoram sawrkarin sawi chhuak rawh se : Lalrinzuala Chawngthu, Vice President

PC Party Vice President Lalrinzuala Chawngthu kaihhruaiin vawiin khan PC Party Office Bearer Meeting, Gen. Headquarters Office, Treasury Square, Aizawlah an nei a, thil hrang hrang an rel.
Meeting-ah hian Lalrinzuala Chawngthu chuan August 9, 2022 (Thawhlehni)-a Assam leh Mizoram sawrkar aiawhte ramri chungchangah Aizawla an inbiak leh tur thu sawi chhuakin, August 5, 2021-a Assam leh Mizoram sawrkar aiawh inbiaten ramria buaina chhuak denchhena thuchhuah intawm an siam kha: July 26, 2021 inkahna a lan laiin, Assam-in indo thuam famkim nen Mizoram min rawn runa kan police camp an pawnglak kha Mizo/Mizoram mipuiin kan dem tak zet a. Thuchhuah intawmah hemi chungchang hi a lan loh avang leh, ramri leh a chheh vela remna leh muanna vawnhim remtih thu thuchhuahah telin, kan ram anga kan hauh chin hauhna lam hawi leh chumi mila insiamfel tumna pakhat mah a lan loh avangin PC Party chuan kan pawm ve theih loh thu a sawi.
August 9, 2022-a Assam leh Mizoram aiawh inbe leh turah July 26, 2021 thil thleng sawi chhuak a nih a, thuchhuah intawm an siam leh a nih chuan: Assam-in indo thuam famkim nena July 26, 2021-a min rawn run demna te, kan ram chhung atanga Assam an inlak chhuah phutna leh kan ram chhung anga kan ngaih huan tam tak Assam police-in an luah atanga chhuak tura phutna te Mizoram sawrkar aiawhten sawi chhuak ngei ngei rawh se, a ti a. Thuchhuah intawm siam leh a nih chuan hengte hi telh ngei ni rawh se, a ti bawk.