Vawiin khan Mizoram Journalist’s Association (MJA) chuan an Aizawl Press Club, Treasury Square-ah Advance Christmas an hmang a, hun hniahah thenin hunkhatnaah hian MLA-a tling tharte lawmpuina hlan K. Sapdanga, Minister, Home, etc. leh Lalnghinglova Hmar, Minister of State, Sports, LESDE, Excise, etc. te hnenah hlan a ni a. MJA member thar 4 lakluhna hun hman a ni bawk.
MJA member, MLA leh minister ni ta pahnih hnenah lawmpuina thuchei (citation) leh Rs 10,000 hlan a ni a; Pu K Sapdanga hnenah Pu Lalbiakthanga Pachuau-in a hlan a, Pu Lalnghinglova Hmar hnenah Pu DR Zirliana’n a hlan a ni.
Aizawl Press Club sound system tihchangtlunna atan Pu Lalnghinglova Hmar hian Rs 10,000 a hlan a, Pu K Sapdanga’n senso dang zawng zawng a tum tur thu a puang bawk.
MJA president chuan thusawiin, “Kumina MLA inthlanpuiah MJA member pali an ding a, pahnih an tling a, pahnih an tling zo lo hlauh a. Kan member pahnih an tling hi kan lawm em em a, minister an ni ve ve leh zel a, kan lawm tak zet a, MJA min timawitu an ni. Anmahni leh an chhungte kan lawmpui em em a ni. MJA-in manganna kan neiha kan hmachhuan turte an ni a, kan thla an timuang em em. An kal zelna turah duhsakna kan hlan a, ram leh hnam rawngbawlnaah hmingtha taka an thawh chhoh kan duhsak a ni,” a ti.
Pu K Sapdanga chuan, “MJA-in lawmpuina leh chawmawina min hlan hi a hlu a, ka lawm tak zet. MJA-a kan inthlunkhawmna hi a nghet hle, MJA hi a hlu tak zet a ni. Chanchinbu hi politics-a ka keuna a ni a, ram rorelna pawimawhzia ka hriatna a ni. Kan senior ten ram an vei em em a, chu chuan politics-a lut tur leh ram hruai hna thawh duhna nei turin min kaihruai a ni.
“Chanchinbumite hi Home dept nen kan thawhho nasat a ngai dawn, a chhan chu mipui rawngbawl tur chuan mipui zirtir nasat a ngai dawn. Social reform lamah tan kan la dawn a, theihtawp chhuaha min thawhpuia min thláwp turin ka ngen che u a ni,” a ti bawk.
Pu Lalnghinglova Hmar chuan, “Chanchinbumi ni lo ila tun dinhmun hi ka thleng kherin ka ring lo, chuvangin media hi ka tan a hlu hle. Minister ni tura thutiam kan lâk tawh avangin mdia lama tel zel a rem tawh rih lo a, chanchinbu khawvel ka chhuahsan a ngai rih dawn a, awm thiam a har dawn hle.
Department ka enkawl zingah Excise & Narcotics a tel a, hmalakna tur leh thawh tur a tam hle dawnin a lang. Tunlaiin ruihhlo a hluar tak zet a, ruihhlo hluar ber lai kan tawng mek a ni. Chuvangin, ruihhlo hi nasa taka do a ngai a, theihtawp chhuah a ngai dawn a, in mi finchhuah ka ngai hle dawn a. Tha taka kan thawhho chhoh zel ka duh a, ka beisei bawk a ni,” a ti bawk.
