Sports Minister Pu Robert Romawia Royte leh DIPR Minister Pu Lalruatkima ten tukin khan Tuikual Indoor Stadium, Tuikual North-a mi chu an tlawh a, bialtu Councillor, AMC Deputy Mayor ni bawk Pu R. Thanglura’n Minister pahnihte hi a tawiawm bawk a ni.
Indoor Stadium chipchiar taka an fan hnuah khawtlang hruaitute nen inkawmhona hun hmangin Sports Minister Pu Robert Romawia Royte chuan Tuikual Indoor Stadium chungchang hi bialtu MLA, Minister ni bawk Pu Lalruatkima’n a vei thu leh a
sawi zin thu sawiin, a zahawm ka ti a, ka ngai pawimawh hle bawk a ni, a ti.
Khawtlang mipuite duhdan ang ngei a hma lak a tha tih sawiin, Tuikual North leh Tuikual South mipuite bakah Volleyball khel mi ten Aizawl khawpui chhunga court tha an nei lo hi kan vei tlang a, sports discipline lian leh pawimawh a nih avangin court tha neih a ngai pawimawh a ni tih sawiin, Tuikual Indoor Stadium pawh zirchiang turin mithiam ten Technical Inspection an neih vat a, a dinhmun an hriatchian a ngai a, thawm that tur nge, vuak thiah a a thara sak that ngai tih te mithiamten endik se, a rang thei ang bera hma lak a ni ang, a ti a. An project siam lai mek zingah Tuikual Indoor Stadium chu a tel tawh tih sawiin, scheme pathum lai atang he hall sak thatna tur hi an chang mek a, theihtawp an chhuah dawn tih a sawi bawk.
Bialtu MLA, Minister ni bawk Pu Lalruatkima pawhin thu sawiin infiamna hmangin ruihhlo kan do a, kan nek chhuak a, infiammiten taksa uluk taka vawngin zuk leh hmuam thlengin an insum tawh a, thalaite leh infiammite hmasawnna tur kan ngaihtuah zel dawn a ni, a ti a. Tuikual Indoor Stadium ah hian rampum huap
Volleyball tournament te huaihawt a ni thin a, stadium sakna a rei tawh avangin TV a live telecast tur pawhin a buaithlak a, a building a hlui tawh nen sak that a hun tawhin a tul tawh em em a, Sports Minister in a hmunah rawn enpui a, hmalak a tum hi a lawmawm takzet a ni, a ti.
Pu Ruatkima chuan a bial chhunga hmasawnna hna thawh hrang hrang tarlangin Dinthar kawn leh Tennis Court inkar kawng a zauh theih ang ang an zauh tawh tih a sawi a, AMC leh UD&PA te nen tang tlangin veng chhung inkalpawhna tihchangtlun mek a ni a, ruahmanna thar engemawzat siam a ni bawk a ti a. Tuikual North area, Tuikual lui kama Futsal ground siam mek pawh reilote ah phullem phah theih beisei a ni, a ti.
Bialtu Councillor, Deputy Mayor ni bawk Pu R. Thanglura’n Sports Minister leh bialtu Minister chungah an thahnemngaihna avangin lawmthu a sawi bawk a ni.
Tuikual Indoor Stadium kum 1992 a sak niin, Tuikual North Local Council huam chhungah a awm a. Chhawng 6 a sang niin Mizoram State Sports Council kutah a awm mek a, Indoor Stadium huam chhungah hian Basketball Court, Volleyball Court, Judo khelhna, Mizoram Volleyball Association (MVA) office a awm bawk a ni.
Tuikual North & South Local Council hotute, YMA hruaitute, MHIP hruaitute leh MVA hotuten Minister te hi an lo dawngsawng a ni.
