Vawiin ni 16.3.2022 (Nilaini) chawhnu dar 1:30PM khan Ṭanpuia Zahthang-in, ‘Chamdur ram ngawa sanctuary-a mi Sele a kahtir,’ tia dawta Minister Pu Lalruatkima puh a nih chungchangah Mizoram Police Cyber Crime Police Station-ah Pu Lalremruata Sailo, Dawrpui Vengthar chuan FIR a thehlut.
He FIR-ah hian, “Ṭanpuia Zahthang (Lalṭanpuia Zahthang) Ph 9862651240 chuan facebook group-a a comment siamah dik lo takin Pu Lalruatkima, Minister (MLA Aizawl West II) chu Chamdur ram ngawa sanctuary-a mi Sele a kahtir tiin dawtin a puh a. Min bialtu MLA tihhmingchhiat tuma a puhna hi thudik lo leh dawt ngialngan tak a nih avangin hemi chungchangah hian a rang thei ang bera hma min laksak turin ka rawn ngen a che,” tiin a ziak a ni.
FIR thehluttu Pu Lalremruata hi MNF Legal Board-in an ṭawiawm a ni.
MNF Legal Board Secretary Pu David R Lalsawmtluanga chuan, “Kristian ramah politics a nih avanga dawt leh thubelhchiandawllo hmanga social media kaltlanga ram hruaituten beih an tawk thin hi a pawi hle a. Hetianga mi bei ṭhin thenkhat phei chuan mahni hming leh nihna dik pawh tarlang ngam loa tute emaw tihmualpho theihna tur dawt leh thudiklo an post thin hi pawi kan ti hle a. Thuneituten an phu tawk hremna pe ngei se kan duh hle a ni,” a ti.
