AIZAWL: Ni 30.04.2022 Inrinni tlai dar 4:30 khan Pu Tawnluia, MNF Sr. Vice President leh Dy. Chief Minister chuan Bawngkawn Venga Pu KR Ghimire (Saila) chenna inah Aizawl N-I biala Gorkha Unit-6 chhungah mi thar lawmluhna a nei a. MNF chu hnam hnuaihnung (minority) zawkte chawikangtu leh Gorkha-ten land pass an neih theihna tura hmalatu a nih thu a sawi.
Pu Tawnluia chuan MNF-a Gorkha 36 a lawmluhnaah hian thusawiin, “Gorkha-te chu Mizote nen unau anga awmho thin kan ni a, MNF chuan Mizorama pianga sei lian Gorkha-te tan hun rei tak anmahni ram anga an lo enkawl tawhte land pass kan pe tawh a. Kan memorandum of settlement-ah pawh Mizorama minority-te tan chanvo kan humhimsak tlat a, chu’ng zinga mi chu Gorkha-te hi in ni,” tiin, “Congress-in a tih duh miah loh kha keini chuan ram leilung faah kan pawm che u,” a ti.
“India nen kan inremna angin ownership and transfer of land chu kan State thuneihna pumhlum a ni a. Gorkha-te chu land settlement kan pek tawh laiin hnam dangte erawh inner line permit tel lovin an lo lut thei lova, khulam phaivai kan tih maite khuan Mizoramah ram an rawn nei ve ngawt thei lo a ni. Nangni leh keini karah kan inkungkaihna a thuk hle”.
Pu Tawna chuan: “Mizoramah hian minority community kan awm nual a. District Council chhungah pawh hnam tenau zawk tam tak an awm a. Lunglei leh Aizawl khawpuiah pawh tam tak an awm. MNF chuan India nen kan inremna – memorandum of settlement-ah pawh Minority-te chawikanna tur kan dah ngat a ni, a ti a. “Sorkar deptt-ah pawh minority affairs deptt kan nei angin Party-ah pawh MNF chuan minority deptt kan nei.
“Mizoramah hnam hrang hrang, duhzawng inang lo tak tak kan awmkhawm a, sakhaw hrang hrangte pawh kan inzahsak tur a ni,” tiin, Sairanga mithi ruang inhalralna pawh MNF sorkar siam a nih thu leh minority-te tan hmalak chhunzawm zel a nih tur thu a sawi.
Dy. Chief Ministrer chuan SEDP chungchang a sawi bawk a. “Mipui vantlang dawm kang tura hmachhawp kan siam mek laiin hripuiin min tibuai a. Kum hnih chhung invenhimna kan kalpui a. Khatih chhung khan hmasawnna ruhrel (infrastructure) lian kan thawk reng a. Kuminah erawh chuan chhungkaw lam hawiin chhungkaw 60,000, bial tinah chhungkaw 1500 kan target,” a ti.
SEDP Governing Board hnuaiah Executive Board, District Level, Village Level-a Committee din a nih thu leh program duante sawiin, “Governing Board-in min approve tawh a. Khawpuiah pawh hmalakna tur tam tak kan siam tawh a. Nakinah chiang zawkin kan la puang dawn. Kuminah hian thawh khatna kan kalpui ang a, nakumah thawh hnihna, chutiang zelin kum tin kalpui tura ruahman a ni,” a ti a. SEDP beneficiary-te thlangtu tur chu Aizawl khawpuiah chuan Local Council-a Committee te, village level-ah VC-a Committee dinte an nih thu a sawi bawk.
MNF-a Gorkha-te lawmluhna inkhawm hi Aizawl N-I Gorkha Unit-6 Vice President Pu Vikram Thapa-in a kaihruai a. AMC Ward II Councillor Pu Lalringliana’n inhmelhriattirna neiin thusawina hun a hmang a. Aizawl N-I MNF Block President Pu Lalrinmawia Sailo leh Unit-6 President Pu Surej Singh-ten thu an sawi bakah Unit-6 Treasurer Pu Shyam Kumar-a’n lawmthu sawina hun a hmang bawk.
MNF Sr. Vice President Pu Tawnluia hi Pu Lalthanzuala Hnamte, General Secretary, MNF Hqrs leh hruaitu thenkhatten an tawiawm a ni.
