Mizoram Pig Farmer’s Association (MIPFA) chuan vawiin May ni 20, 2024 khan Aizawl Press Club-ah chanchinthar lakhawmtute kawmin, Mizoram sawrkar Animal Husbandary & Veterinary (AH&Vety department) chu Mizoram-a ASF pudarhtu ni theia an hriat thu an sawi a, Frozen vawksa lakluh chu he hri hluar leh chhanah an ngai a, state pawn atanga vawksa lakluh hian an eizawnna a tih chhiat phah nia sawiin a kawl mekte chu May thla chhunga ti riral vek turin hun an pe bawk.
Mizorama Frozen vawksa rawn lakluh hi dan phalloh a ni an ti a. A dan kawngah Mizoram Pig Farmer’s Association chuan theihtawp an chhuah dawn tih an sawi a. Tuna Mizoram a ASF hri leng mek hian zia awm lam a pan theih nan a concern dept. leh sorkar in theihtawp chhuah a hma an lak theih nan hmalak an tum tih an sawi bawk.
Frozen Vawksa lakluh a nih theih nan hian 19th — 22nd October, 2022 chhung khan Vety Dept. Officials, doctor 4 ten Mayur Piggery Farm, Pune Maharastra an zuk tlawh a. An zinna senso hi Mayur Piggery Farm, Pune, Maharastra in a tum sak vek a. Officials te an zin haw hnuah State pawn atanga lakluh phalna Disaster Management and Rehabilitation Dept in a ti chhuak a. He order in a kawh chu Hunpui (festive season) Christmas 2022 leh kumthar 2023 atan mamawh phuhruk nan frozen vawksa ASF free State leh APEDA approved firm atanga lakluh phalna pek a ni, an ti.
Vety Department in Vawksa Frozen lakluh phalna a pek chhuah hi One time tur ni si, vil zuina a neih loh avangin ASF hri veilo annih leh nih loh pawh enfiah loh vawksa frozen te hi zalen takin sumdawng ten an la lut mek a. Hei hian Mizoram chhunga vawkvulhtute kawng hrang hrangin a chhe zawngin a nghawng mek niin an sawi.
MIPFA chuan, “Frozen vawksa lakluh hian Vawkvulhtute vawk hri lakah an him loh phah a. Tunah pawh ASF hri a leng leh mek a, kum zawna hri in a run tawhna atang pawh in an la din mar theihloh laiin. Frozen vawksa lo lut hi vawk vulhtute tan chuan ASF tluk zetin a hlauhawm a, zawi muangin vawkvulhtute an ei hlum mek a, economic assimilation a thlen tir mek a ni,” an ti.
Frozen vawksa Metric ton tam tak a rawn lut mek a, hei hian vawk vulh tuten an thar chhuah hralh kawngah harsatna a thlen mek an ti hawk.
MIPFA chuan Frozen vawksa an duh lohna lantir nan hian chanchinthar lakhawmtute an kawm zawh hnuah AH& Vety department Pigfed Meat House kawt, Khatla pan nghalin Frozen Vawksa hi an halral nghal a ni.
