Dated Aizawl 27th May, 2024 : Vawiin khan ZPM Party Office-ah chhûng inkhawmna hun hman a ni a, thusawitu Pu B. Lalchhanzova, Minister of State chuan, “ZPM hi thil ṭha duh pawl leh mimal kalkhawmte’n tawngtaina nena kan din a ni a, Pathian leh Mipuite zarah Sorkarna kan lo chang ve ta a, Mipui aw ngaithla thin sorkar kan din mek a ni,” a ti.
Minister chuan, “Pawl leh mimal hrang hrang, inkawp rem hlei theilo tura party dang-te’n an ngaih ZPM Party chu hmel fel tak puin tlâng chhîpah kan lawn chhuâk ve ta hlawl mai a, chu tlâng chhîpah chuan mipuite aiawhin ram ro kan lo rel ta a ni, hetiang dinhmun kan thlen theih chhan chu ‘Kei kei ti lo a, nang zawk le’ ti a bul kan ṭan vâng a ni a, he nun zemawi tak hi chhawmnnung zel turin lungrualpuite ka chah a ni,” a ti.
A department chan Food Civil Supply & Consumer Affairs chungchâng sawiin, Minister chuan, “Dinhmun harsate’n an chanvo an chan theih ngeina turin ration card ennawn hna hi thawh chhoh zel tum a ni a, mipuite’n buk tling leh dik taka buhfai an khul theihna turin ruahmanna siam mêk zel a ni, kum nga kalta chhûng khan hriat theih chinah tender hmanga buhfai lei a awm ngai lo a, mipui mamawh aia tam buhfai phurh luhte pawh a awm ṭhin a, ZPM sawrkâr hnuaiah erawh buhfai lei dan phung siam ṭhat a ni; a sem danah pawh dik zawka kalpui tura ruahmanna siam mêk a ni a, retailer-te dinhmun ennawn a, an lawmman-te pawh tihpun tum niin, buhfai buk dik zawka an hralh theihna tura ruahmanna siam mek a ni,” a ti.
Pu B.Lalchhanzova chuan a department chan puala hmalâkna kal mêkte tarlangin, “Retailer-te buhfai sem bâng hralh kan remtih tâk loh avângin a lo berah kum khatah buhfai quintal 80000 vel, a pawisa a zawngin Rs. Vaibêlchhe 70 vel hum theih kan inbeisei a, Zo buh thar (Buhhum) pawh lei kan tum a tin, Mualkhang Bottling Plant thar thawh leh tura hma lâk chhoh mêk a ni a, Oil Depot nei turin tha thlah lo a hma lâk mek a ni,” a ti. “Ram teh leh a kaihhnawih hna muang lutuk ṭhin tifel turin Survey Outsourcing ti tura hmalâk a ni a, complaint box-te siam niin lungawilohna leh rawtna nei chuan theh luh zêl theih a ni,” a ti bawk.
Pu Chhanzova chuan, “Tun hnaiah a bîk takin MNF party worker ṭhenkhatte’n ZPM Sorkar hnuaia hna thawh felhlel tam tak awm angin an rawn pho chhuâk ṭhin a, heng hi mipuite’n lo zir chiang hmasa thin se kan duh hle a ni, zing lama an rawn post hi tlai lamah chuan a thu a dang leh fo thin a, ZPM thu leh hla in hriat phawt loh chuan lo awih fel nghal duak duak lo turin ka chah che u a ni,” a ti bawk.
