Vawiin August ni 9, 2025 hian MPCC Treasurer Dr. Lalmalsawma Nghaka chuan Sihphir leh Lungdai inkar kawngpui chhia a tlawh.
Dr. Lalmalsawma Nghaka chuan, “Tun ṭhal chhungin he kawng hi siam thar vek ni mahsela, thla 3-4 lek hnuah tlan ngaihna awm lo khawpin a chhe leh hman a ni. Kum 15 daih kawng kan siam dawn tia mipui hmaa intiamtute sawrkar-na hnuaiah Aizawl khawpui chhung kawng a ni emaw, khaw kar kawng, a khawi a mah hi fur khat daih an awm ta mang lo hi a vanduaithlak hle a ni.
“Sawrkar kan hrawn lai mek hian an mawhphurhna, a fawng vuantu an ni tih inhai tawh lovin, NHIDCL, BRO, leh Contractor te mawhpuh tum zel tawh lo se a duhawm hle a ni,” a ti.
MPCC Treasurer chuan, kawngpui a chhiat avanga mipui tawrhna chu pawi a tih thu sawiin Lungdai, Serkhan, Zanlawn leh Bukpui tlangdungte’n awlsam taka an thlai tharte Aizawl Bazarah an hralh ṭhin chu kawngpui chhiat avanga an thlai tharte Aizawl Bazara an hralhnaah harsatna an tawk mek a, heng lai hmun atanga Aizawl rawn thleng turin zankhua thak thak te kal a ngai ta mai hi an lainat awm hle a ni, ti a.
Zin veivak leh lirtheia eizawng ten nasa takin harsatna an tawk mek a, a bik takin dam lo inphur te tan phei chuan a manganthlak lehzual hle a ni, a ti bawk.
MPCC Treasurer Dr. Mala chuan, nikum September thla aṭangin mipui ip atangin kawng siamna tur chhiah (cess) tih luihna in an la a, tunah hian kawng siam nan tuialhthei chhiah a lak tling khawm chu nuai 2300 dawn a ni tawh. Kawngpui siamna atana lak tur ti siin vawiina kan kawngpui dinhmun chu a chhe hle a.
Nimin maiah pawh Aizawl Bawlhhlawh paih motor khalhtute pawhin kawngchhe siamin an hnatlang a. Chhiah nasa taka a pung chunga Mizoram history-a kawng a la chhiat ber tum kan thleng chho mek hi a inhmeh lo takzet a ni, a ti.
Dr. Lalmalsawma Nghaka chuan, kawngpui chhiat avanga kan sumdawngte dinhmun chungchang sawiin sumdawng tam takten loan hmangin an bungraw chahte a hun taka a thlen theih loh avangin, loan rulnaah harsat tawk an awm mek a, an dinhmun a harsa hle. Kawngchhiat avangin sumdawng tam tak an tlachhe mek a, hei hi a pawi tak zet a ni, a ti bawk.
