MPCC chuan vawiin a thuchhuah a siamah, “Nimin Dt 10.6.2025 khan kan Chief Minister chuan Mizoram State Water Informatics Center a hawnna-ah ZPM sawrkarin inrenchem kum (Year of Consolidation) a puan an hman zawh tawh thu leh hna thawk tura ke an pen tan thu a sawi kha mipui laka thudik thup nan leh lan mawi tum nan Year of Consolidation puan a sawi ve mai ah kan ngai a ni.
“Congress sawrkar a Chief Minister Pu Lal Thanhawla hunlai khan Year of Consolidation hlawhtling takin kan puang a, kha mi entawn khan Year of Consolidation ZPM sawrkar hian an puang ve a. Mahse tumna tak tak an neih loh avangin sawrkar senso nasa takin an tipung a, sawrkar leiba pawh an sawrkar chhung kum khat leh a chanve chhung lekin vaibelchhe 3,133.45 in a pung hman a ni. MNF sawrkar chhung 2018-2023 chhung khan kan leiba punna chu vaibelchhe 8,671.79 a ni a, a punna a sang hle a, ZPM sawrkar hnuaiah hian hetianga leiba punna a chak chhoh zel chuan MNF sawrkar kha a khum thei dawn a ni. Hetih lai hian Congress sawrkar chhung 2008-2018 khan sawrkar leiba punna chu vaibelchhe 3,365 chauh a ni a, MNF leh ZPM sawrkar hnuaia leiba punna nena khaikhin chuan a hniam hle a, tum hnih lai revenue surplus a awm nghe nghe a ni.
“Year of Consolidation puang si in Adviser to CM 5, Minister of State rank an ruat belh a, MLA FUND nuai 150 atangin nuaih 200 ah an tihpun bakah MLA te hamthatna an tipung bawk. CM Bangla, Speaker Bangla leh Minster te Bangla bakah an chenna in te sum tam taka chei a nih bakah furniture leh sofa man to tak tak nuaih 2 chuang man te an lei bakah Speaker hman tur lirthei nuaih 28 man vel an lei bawk.
“Heng te avang hian sum indaih lohna a nasa ta em em a, pawisa indaih lohna a nasat em avangin Supplementary Demand vaibelchhe 3,512.33 lai kan neih phah ta a, Covid lai tih lohvah chuan a san ber tum a ni a, Year of Consolidation kan puang tih nen a inhmeh lo hle.
“Adviser to CM 5 te office enkawlna leh staff te hlawh atan hian kum khatah vaibelchhe khat aia tam a kal tura chhut a ni a. Board Chairman hrang hrang te hlawh cheng 8,000 atangin cheng 40,000 ah an tisang a, Consultant leh OSD Secretary level te an ruat nual bawk. Tul lovah an party hotute tan post an siam chawp teuh a, Board Chairman, Consultant leh OSD ah te an inruat teuh a, hei hian sawrkar pawisa hmanna nasa takin a tipung a ni. Chuti chung a Year of Consolidation, inrenchem kum kan puang an ti hi chu an tum an thelh chiang hle.
“Hna kan thawk dawn a tih te hi Budget an pharh tak atanga en chuan hnathawhna tur sum tihtham Department tin budget kha en in an dah lo a ni. Department pawimawh em em Education Department ah hian hmathar lakna an dah lova, repair leh maintenance atan nuaih 12.40 an dah tawk a, Health ah hmathar lakna nuaih 141 leh repair and mantenance atan nuaih 186 chauh an dah te hi a tlem hle. Mipui thleng phak department Agriculture Department ah hian hnathawhna tur nuaih 32 chauh dah a ni a, Horticulture ah phei chuan nuaih 4 chauh dah a ni. Kawng siamtu Department PWD ah hian hnathawhna tur nuaih 1,073 chauh dah a ni a, repair and maintenance atan nuaih 49 chauh dah a ni bawk a, a tlem hle a, kan kawng te a ngaihtuahawm dawn hle a ni” tiin a tarlang.
