Aizawl 29th May, 2023: Vawiin Thawhtanni khan ZPM chuan Party Office-ah chhung inkhawm kan hmang a, thusawitu PC. Vanlalruata, Secretary General chuan, “Ram mipuite duh leh hmuh chak ber chu mipui sawrkar dik tak a ni a, chu sawrkar din tur chuan ZPM-ah mipuiten rinna an nghat fel tawh a ni,”a ti.
PC. Vanlalruata chuan thusawiin, “Kan hriat angin kum 1987 khan State kan ni a, State kan nih atangin Congress party-in kum 20 ro an rel a, MNF-in kum 16 chuang ro an rel tawh bawk a. Chutianga party pahnih ro inrel chhawkna hnuaiah chuan kum 37 zet kan awm a, kan dinhmun chu mipuiten kan hre tlang vek a ni. Vawiin hian mipuiin sawrkar siam turin ZPM min beisei mek a, min beisei chhan hi MNF leh Congress nin tawh vang a ni thei a, Pu Lalduhoma hi eng nge a lo nih chiah tih hriat leh enchhin hrim hrim duh pawh mi thahnem tak kan awm bawk. Kan sawrkar lo hrawn tawhte mipui sawrkar aia party sawrkar dintu an ni a, mipui sawrkar tak tak hi mipui hian hmuh an chak tawh a ni,” a ti.
PC. Vanlalruata chuan, “Tunlai hian sum leh pai hman dik lohna avangin rorel lai MNF party an buai hle a, chhungkhat laina induhsakna uchuak avangin party workers tam tak an beidawng mek bawk. Chief Minister ni mek leh Minister thenkhat mahni bial ngaia ding nawn ngam lova bial dang zawng mek an kat nuk a, Congress chhungkuaah lah harsatna namen lo a thleng mek a, Team thar din tum leh Ex-MLA rual an in Mu leh Ar mek a ni. Heng boruak zawng zawng hriat hian ZPM tan kawl a eng hle a, chutihrual chuan Pathian duh anga kan party hian ke kan chheh fuh loh palh chuan chunglam hian sawrkarna min pe lo thei. Chuvangin hruaitute rorel ngaichang thiam nih tum ila, thuawihna tel lo chuan Pathian thuah leh Politics-ah hian thil ropui a thleng thei lo a ni,” a ti bawk.
Lalmuanpuia Punte, PAC Member pawhin Manipur-a thil thleng chungchang sawiin, “Vawiinah hian kan unau Zofa Manipur-a cheng ten harsatna namen lo an tawk mek a, Manipur sawrkar ruahmanna tenawm tak a lang chho mek zel. Khaw hrang hrangah inkahna a thleng reng a, Meitei lam hi an sawrkar sipai nen an tang a, chuti chung chuan Pathian hruaina avangin kan unaute an dinhmun a la tha zawk zel a, sawrkar tha lo hnuaia awm an nih avangin an inthlanna thleng khian a buai nasa thin hle a ni. Mizoramah kan unau ten harsatna lian tak an tawh avangin pawl hrang hrang kaltlangin kut an rawn dawh mek a, thahnemngai taka kan theih ang tawka lo pui turin Zoram mipuite ka sawm che u a ni,” a ti.
ZPM chhung inkhawm hun hi Lalthlamuana, PAC-in a kaihruai a, Rev. S. Lalkhuma chuan hunserh hmangin Genral Headquarters hruaitu hrang hrang zinchhuakten report an pe bawk.
