Vawiin August ni 12, 2022 Zirtawpni hian Mizo Hnam Runah chhung inkhawm hun hman a ni a, he hunah hian Pu Lalrinenga Sailo, AMC Mayor leh MNF Adviser ni bawk chuan thu a sawi.
Pu Lalrinenga Sailo chuan, Khawvel thang chho mek zelah Mizoram pawhin hma a sawn chho zel a, Mizoram khawpui ber Aizawl hi thang chho mek a nih avangin faina leh thianghlimnaah pawh hma kan lak nasat angai a ni a ti. Kan khawpui a lo changkan chhoh zel theih nan chuan mipui ten kan zir a ngai a, kan bawlhhlawh paih danah te leh kan chheh vel enkawl danah te mipui ten mawh kan phur a ni a ti. Tunah pawh AMC chuan kan khawpui a lo thianghlim theih nan bawlhhlawh paihna hmun tur te a siam a, kan bawlhhlawh paih kha leithaah te kan sawng bawl leh thin. Kan bawlhhlawh paihte hi mi thenkhatin inhlawh nan te an lo hmang a, ei leh bar hmuh nan te an lo hmang leh thin a ni, a ti.
MNF Adviser chuan Social media hi a chak tawh hle a, mipuite pawhin khawvel inlum let dan kan thliar hrang thiam tawh hle a, kan thang harh tulh tulh tawh a, thudik leh dik lo kan thliar thiam tawh hle a. Tun a AMC in hma kan lak mek pawh hi tute emaw political party in Politics a hamthatna lak tum a, mipui rilru hruaikawi tumin dawt hmangin, social media hmun hrang hrangah AMC hmalakna thenkhat an vawrh darh thin chu tha a tih loh thu sawiin, kan khawpui a lo thianghlim theih nan chuan kan tan ho a tul a ni, a ti bawk.
Mayor Pu Rinenga chuan Aizawl tuitlan lakna Tlawng luia bawlhhlawh paih a nih loh nan tlawng kam kawngpui hrulah len zar a ni vek dawn a. Hei hi thui tak thawh tawh a ni a ti.
Hnam Run chhung inkhawm hi Pu PP Thawla Ex MLA, Adviser MNF Gen. Hqrs. ni bawk chuan kaihruaiin, Pu T. Lalhmachhuana Gen. Secy.in hunserh a hmang a, party mi thahnem tak an kal a ni.
