Vawiin ni 23.4.2025 (Nilaini) hian Pu Lal Thanzara, President MPCC chuan Zamuang, Kolalian, Hriphaw, Sihthiang, Chuhvel leh Saikhawthlir khuate tlawhin Congress Party ah mithar 59 a lawmlut a, NLUP tanpuina atanga Kuhva leh Rubber chinga eizawnna mumal neite a hmunah a tlawh nghal bawk.
Lal Thanzara, President MPCC chuan, “Mizoram mipuiin ZPM party enchhin an chak a, hei hi Congress a sorkar lehna tura kawng min sah kuak sakna niin a lang a. Enchhin sorkarin mipui beisei a phak lo nasa hle a, hei hian Congress party Mizoram tana a lo thatzia tichiangtu leh fiahtu a ni,” a ti.
Lal Thanzara chuan, “Tawngkam dengkhawng taka Congress Bhawan ka lilam dawn titu chuan a inzawrhna anga ti thei si lovin kuthnathawktute harsatna thlentu Smuggling thil mipui hriat lohin an lilam mek a ni, tih sawiin Pu Lal Thanzara chuan kuhva lang lovin thlâ a lak theih loh tih khawpin Hachhek tlangdungah NLUP chingtute an hlawhtling a, dinhmun nuam takah an din phah a ni. Mahse Kuhva tawlh ruk hmangin MNF leh ZPM sorkarin a tihchhiat sak a, a lungchhiat thlak hle a ni, a ti.
Pu Lal Thanzara chuan, Congress a sorkar loh chuan Hnam hnufual leh tlem zawkte an him lova, mipuiah sum lengvak a tlem a, ruihhlo ti leh ruihhlo zawrh a hluar a, khawtlang nun a him lo a, Congress party hi Mizoram mamawh chhanna a ni, a ti a. Congress party chu miretheite lamtang a ni a, Kan ram, kan hnam kan sakhaw tan a ni. ZPM leh MNF party ruahmannaah khawpuiah miretheite leh thingtlang mite an tel lova, kuthnathawktute tan mangchhia an ni,” a ti bawk.
