MPCC Campaign Committee ruahmannain Oct 29 – Nov 3, 2022 chhung hian Aizawl khawpui chhung Local Council huam chhunga Congress Unit tlawhchhuahna hun hman a ni a. He hunah hian Congress atanga MLA, MPCC Gen.Secy, Secretary leh Executive member te, MPCC Frontal leh Dept/Cell President/Chairman leh an thawhpuite bakah ADCC Gen.Secy leh Secretary rualte’n hun an hmang a. Congress Unit lamin phur tak leh tha takin an lo dawngsawng thin a. Khawpui chhungah Congress party in hmasawnna nasa tak a neih zui zel a beiseiawm niin MPCC chuan an sawi.
Aizawl Khawpui chhung Congress Unit tlawhchhuah programme-ah hian Team Leader ruat zel a ni a, thusawi zawhah Unit member te nen zawhna leh chhanna hun zalen takin hman zui thin a ni bawk. Heng hunah hian Laipuitlang leh Bungkawn Unit tlawhchhuahnaa Team Leader, Dr. Lallianchhunga MPCC Spokesperson pawhin thusawiin, ‘Congress party hi pawl zahpuiawm lo tak a ni a. Sakhaw zalenna chawisangtu party a nih avangin Kohhran rawngbawltu tam tak te awm mekna a ni. Hei vang hian kan party a rawn lut a, inhmang chhunzawm thin te hian Congress party hi nuam an ti thin. Mizoram tan thil tha tam tak Pathian zarah a lo thawk hlawhtling tawh a, heng te hi thangtharte hian an la chhawr dawn chauh a ni. Kan tih tura kan hmachhawpte pawh thang leh tharte tana rotling tur a ni zel’ a ti.
Dr. Lallianchhunga chuan, ‘Tang Puihna’ hi rilru siam thatna (Moral reformation) nena inkawp tlat a ni a, Bible zirtirna nena inmil Manifesto a ni. Pathian thu chuan, “Tupawh thawk lo chuan ei pawh ei suh se” (2 Thessalonika 3:10) tiin min zirtir a. Dinchhuah tuma theihtawp chhuahtute kan kalsan dawn lova, an mamawh dan a zirin cheng nuai bi atangin, mamawh intawm a nih phei chuan cheng vaibelchhe tel thlengin kan pui dawn a ni, a ti bawk.
Congress party hi Zoram tana rotling (asset) siamtu a ni thin tih sawiin, Dr. Lallianchhunga chuan, “Congress party hian Pathian zarah sorkarna a siam laiin sorkar hmasate hmalak tawhna chhunzawmin a tipuitling thin. Compensation avanga hluihlawn hial tawh Tuirial Hydel Project pawh a siam puitling leh a; Dec 16,2017 a hawn a nih atanga Mizoramin a thlawna kawlphetha a dawn hlut zawng chu cheng vaibelchhe 30 chuang man a ni tawh a, Tuirial Hydel Project in power a siamchhuah zawng zawng hi Mizoram sorkarin a lei vek bawk a ni. Falkawn a Referral Hospital pawh MNF sorkarin Ar Vulhna atan lo hmang tawh mahse Mizoram mipuite’n kan mamawh zia hriain Damdawi lam zirna In sang changtlung tak ni turin a buatsaih a, COVID-19 hripui leng karah pawh a tangkaizia mipuite’n kan hria a ni’ a ti.
Dr. Lallianchhunga chuan MNF chungchang sawi langin, “MNF sorkar hi lal Saula hun hnuhnung ang mai kha a ni a; Pathian hriak thih Davida tan lal saula beih nan hun a uihawm lutuk. MNF sorkar hi Eptu party ten an beih ngai miah loin an thiltih that lohin a rawn vaw let zel.CM fanu in doctor kut a thlak te pawh eptu party te hmalak vang a ni lo. Kamrula Chhangte te bakah, Assam sorkar Wanted Abu Majumdar te nena sam an inphiar zawm dan te hi Mizo mipuite’n kan hria, MNF lakah hian mipuite’n thutlukna kan siam fel tawh” a ti.
Dr. Lallianchhunga chuan, “Congress party chuan enchhin pawh ngai lo, sum leh paia mi rinawm, Mizoram sorkar sum dinhmun siam tha theitu tur hruaitu kan nei a. Khawi ramah mah ‘min enchhin ve rawh u’ tiin party an inzuar ngai lo. Eng ram mahin ‘Enchhin sorkar (Experimental Government) an duh lo. Mi tha nia an hriat, an hriat chian sa an thlang thin zawk a ni’, a ti bawk.
