Vawiin ni 26 September 2022 hian Chief Minister, MNF President ni bawk Zoramthanga chuan Mizo Hnam Runah thu a sawi a. “Mizoram Health Care sum puk kan tum chungchangah mipui bum tumin thu chhum bung sawichhuak an awm ṭhin a. Keima ṭawngkam ngei hawhin ‘bang chhak sathlaka bang thlang bel ang a ni’ tiin an sawi a. Asian Development Bank (ADB)-a Central sorkar-in sum puk min phalsak tawh vaibelchhe 1000-a, vaibelchhe 720 hi Central sorkar rulh tur a ni a. Mizoram sorkar-in kan rulh ve tur chu zaa 28 chauh a ni. In sak ṭhat nan mau lian pui pui kan pu thleng thar dawn a ni zawk,” a ti.
Chief Minister chuan tunhnaia Central sorkar dawra Delhi-a a zin report a pe a. Chief Minister chuan kar hnih dawn thanga Delhi-a a cham chhungin – President, Prime Minister, Home Minister, Defence Minister, Finance Minister, Education Minister, Health Minister, Social Empowerment Minister, MoRTH Minister te a hmuh thu a sawi a.
Pu Zoramthanga chuan heng mi pawimawh tak tak a hmuhte hi Mizoram tana hmasawnna tur kawng hrang hrangin a sawipui tih a sawi a. Heng a mi hmuhte aṭang hian chhanna lawmawm tak a dawng thu a sawi a. Heng bakah hian mi pawimawh tak tak e’ngemaw zat a hmuh thu a sawi bawk a ni.
Chief Minister chuan India mi pawimawh hrang hrang a hmuh te’n Myanmar buaina chungchang an ngaihven em em tih a sawi a. “Myanmar buaina chinfel a nih theih nan India min mamawh zia thu ka sawi a. Mizoram hi peace talk-a remna tluan tling nei thei State kan ni a, kan remna leh muanna neih ang hi an mamawh a ni,” a ti. India mi pawimawhte hnenah hian Myanmar buaina a tawp theih nan India a inrawlh ngei a ṭul thu a thlen tih a sawi bawk.
Chief Minister chuan, “Mithiam hrang hrangte thurawn ang leh ZMC changtlung zawk kan neih theih nan, Zoram Medical College chu Central kut a awm theih nan Health Minister ka sawipui a, theih tawp lo chhuah a tum thu a sawi a. Assam Rifle hmun tur Zokhawsanga mi hawng turin Home Minister ka sawm bawk a. Home Minister hian November thlaah a lokal tur thu a sawi a. A pui ber arbawma a luh tawh chuan a note te chu pawnah an awm reng kan ring lo. Assam Rifle te hi an awmna tur sak zawh vek tawh, a zatve pawh awm tawh an ni a, an insuan thuai kan ring,” a ti.
Pu Zorama chuan, “MZU Southern Campus, Lungleia dah tur chungchangah HRD minister ka hmu bawk a. MZU-in thla a zarna tur hmun Southern Campus hi in enkawl tur a ni, kan ti a. Theih tawp lo chhuah a tum thu minister hian a sawi,” a ti.
MNF Returnee te in sakna tur tanpuina dil thu pawh Prime Minister leh Minister pawimawh dang te Chief Minister hian a sawipui tih a sawi bawk.
Mizoram CM chuan Assam CM Himanta Biswa Sharma nen an inkawm thusawiin, “Kuhva ro smugling-a lo lut theih tawp a do tur leh kan farmer-te kuhva thar ṭha taka an hralh theih nan theih tawpa hmalakte kan sawi dun a ni,” a ti.
