Dated Aizawl, the 22nd November, 2022:_ Congress Thalai Hqrs – Mizoram Pradesh Youth Congress Committee (MPYCC) President Dr. Lalmalsawma Nghaka chuan, mipuite manganna a awm apiangin Congress Thalai – MPYCC ten ke kan pen zel tur a ni, a ti.
MPYCC Executive Meeting vawiina Congress Bhavan-a neihah Dr. Lalmalsawma chuan he thu hi sawiin, “Healthcare bill tang avangin mipuiten harsatna an tawk nasa em em a, damloh inenkawlna bill la thei lo mangangte au rawl hi Congress Thalaite chuan ngaihthlak reng hi hrehawm kan ti takzet tawh a. An thlavang hauh nana High Court meuha PIL thehluh tawh pawh High Court-in thutlingah ngaia a lo pawm ta hi Congress Thalaite chuan lawmawm kan ti hle a. Mipuite harsatna hrang hrangah an thlavang hauh turin theihtawp kan chhuah zel dawn a ni,” a ti.
Dr. Mala chuan, Congress party-in manifesto No. 1 kan release atang khan ram siam tak tak tumna manifesto a ni tih a chiang hle a. Mipui vote duh vanga tih theih miah loh leh tih tum miah loh intiamkamna pakhat mah a tel ve lova. Keini chuan sawrkar tha siam tumin Mizoram mipuite leh theihtawpa tang mekte, anmahni ke-a an din theihna tur manifesto a ni a. Congress kan sawrkar leh a nih chuan sawrkarin theihtawp a chhuah dawn a. Sawrkar leh mipuite tangrualin Mizoram nuam kan siam ang a, inlawm tawnin kan tang tlang dawn a ni, a ti.
Congress Thalaiten mi harsa leh damlo mangan tanpui ngaite tanpui hi kan ngai pawimawhin, kan ngaihsak tur a ni, tiin Dr. Lalmalsawma chuan, an tan kan tha leh zung leh kan neih ang chhun chhunte hi kan ui tur a ni lo. Sum leh paia kan tanpui thei lo an nih pawhin kan tha leh an tana tawngtaisak hi kan tih mak mawh a ni. Sawrkar tha siam turin Mizoram mipuite a bik takin Thalaite kan sawm tak meuh meuh a che u, a ti bawk.
Vawiina Executive Meeting hi Ngurdingpuia Pachuau, MPYCC Treasurer chuan a kaihruai a, pawl hmalakna tur leh hmachhawpte inpawhtlang takin an sawiho a ni.
